ՄԱԿ-ը տեղեկություններ չունի այն մասին, թե ով է կանգնած Mercer Street լցանավի վրա հարձակման հետևում։ Այս մասին ճեպազրույցի ժամանակ հայտարարել է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը:
«Մենք կոնկրետ տեղեկություններ չունենք այն մասին, թե ով կարող էր հարձակվել նավի վրա», – ասել է նա:
Դյուժարիկը հստակեցրել է, որ ՄԱԿ-ը անկախ ապացույցներ չունի, որ, ինչպես պնդում են ԱՄՆ-ն ու Մեծ Բրիտանիան, լցանավի վրա հարձակման հետևում կանգնած է Իրանը: Նա հավելել է, որ կհստակեցնի ՝ արդյոք նշված երկրներից այդ մասին տեղեկատվություն է ստացվել։
ԱՄՆ-ի պետքարտուղար Էնթոնի Բլինկենը կիրակի օրը հայտարարել էր, որ ԱՄՆ-ը, հիմնվելով առկա տեղեկատվության վրա, վստահ է, որ Mercer Street լցանավի վրա վերջերս կատարված հարձակման հետևում կանգնած է Իրանը, այդ հարձակմանը «արդարացում չկա»”
Մեծ Բրիտանիան ևս Իրանին մեղադրել է Mercer Street լցանավի վրա հարձակման մեջ։
Ավելի վաղ Իսրայելի վարչապետ Նաֆթալի Բենեթը Թեհրանին մեղադրել է Արաբական ծովում Mercer Street ճապոնական լցանավի վրա հարձակման համար պատասխանատվությունից խուսափելու մեջ:
Ճապոնական Mercer Street լցանավի վրա հարձակմանը Թեհրանի մասնակցության մեղադրանքներն անհիմն են, ասել էր Իրանի ԱԳՆ պաշտոնական ներկայացուցիչ Սայիդ Խաթիբզադեն։
Zodiac Maritime օպերատոր ընկերությունը ուրբաթ օրը հայտնել է, որ Ճապոնիային պատկանող Mercer Street լցանավը ենթարկվել է Հնդկական օվկիանոսում ենթադրյալ ծովահենային հարձակման։ Հաղորդվում էր, որ անձնակազմի երկու անդամները՝ Բրիտանիայի և Ռումինիայի քաղաքացիները, զոհվել են։ Հետագայում անձնակազմը վերադարձրել է վերահսկողությունը նավի նկատմամբ և սկսել է շարժվել ԱՄՆ ռազմածովային ուժերի ուղեկցությամբ:
«Ասոշիեյթեդ Պրես» գործակալությունն ընդգծում է, որ Լիբերիայի դրոշի ներքո ընթացող նավը կապված է իսրայելցի միլիարդատեր Էյալ Օֆերի հետ, որին պատկանում է Zodiac Group-ը:
ԱՄՆ Զինված ուժերի Կենտրոնական հրամանատարությունում կարծում են, որ նավի վրա հարձակումը, նախնական տվյալներով, իրականացվել է անօդաչու սարքի օգնությամբ:
