«Ես չեմ կարծում, որ հայ-ադրբեջանական սահմանին տեղի ունեցող զարգացումները կարող են բերել լայնամասշտաբ պատերազմական գործողությունների։ Նման բան ասում են միայն հստակ քարոզչություն իրականացնող մարդիկ»,-«Առաջին լրատվական»-ի հետ զրույցում անդրադառնալով սահմանային լարվածությանը նման տեսակետ հայտնեց ռուսաստանցի քաղաքագետ Ստանիսլավ Տարասովը։
Հայաստանն ու Ադրբեջանը, հիշեցնենք, համաձայնել են Մոսկվայի միջնորդությամբ դադարեցնել կրակը։ ՀՀ ԱԳՆ-ն հաստատել է, որ հրադադարը պետք է հաստատվեր տեղական ժամանակով ժամը 10։00-ից և այս պահի դրությամբ այն հարաբերականորեն պահպանվում է։
Հիշեցնենք նաև, որ ՀՀ ՊՆ–ն ավելի վաղ հայտնել էր` հուլիսի 28-ին, ժամը 03:40-ի սահմաններում, ադրբեջանական ԶՈւ ստորաբաժանումները հերթական անգամ դիմել են սադրանքի և խախտել հրադադարը հայ-ադրբեջանական սահմանի հյուսիսարևելյան հատվածում: Ընթանում էին տեղային մարտեր և երկու կողմից էլ կան կորուստներ։
Ստանիսլավ Տարասովը կարծում է, որ Մոսկվան անում է հնարավոր ամեն բան, որ հայ-ադրբեջանական հարաբերությունները լարված չլինեն․«Մենք Հայաստանի ու Ադրբեջանի հետ համատեղ ստորագրել ենք եռակողմ համաձայնագիրը և այդպիսով հանդիսանում ենք իրավիճակի կայունության երաշխավորը։ Ուստի պետք է ամեն ինչ անենք նոր պատերազմ թույլ չտալու համար։ Բաքուն ու Երևանին կոչ ենք անում երկխոսություն սկսել, ստեղծել բարենպաստ մթնոլորտ, որպեսզի հնարավորություն լինի խաղաղության համաձայնագիր ստորագրել»։
Մեր զրուցակիցն ընդգծեց՝ պատերազմը 30 տարի շարունակվել է, արյունալի հակամարտություն է եղել, երկու կողմն էլ զոհեր են տվել ու հնարավոր չէ կարճ ժամանակահատվածում իրավիճակը կայունացնել․«Նման բաները շուտ չեն անցնում, շուտ չեն մոռացվում։ Չենք կարող նման կարճ ժամանակահատվածում հայերին ու ադրբեջանցիներին ստիպենք սիրել իրար, դա ռեալ չէ։ Երկրորդ՝ որպեսզի իրավիճակը նորմալանա, երկու կողմերը, իսկ Բաքուն առավելապես պետք է ջանքեր գործադրի, որ հայերը իր կողմից վտանգ չտեսնեն։ Հայերը պետք է իրենք անվտանգ զգան ու զբաղվեն ներքին խնդիրներով։ Չնայած մյուս կողմից էլ հասկանալի է այն շոկային իրավիճակը, որ կա երկրորդ ղարաբաղյան պատերազմից հետո, դեռ երկար կպահպանվի»։
Քաղաքագետը նշում է, որ սահմանային լարվածության պատճառներից մեկն էլ այն է, որ առայժմ դեմարկացիա ու դելիմիտացիա չի արվել և նա այդ աշխատանքների իրականացումը խիստ անհրաժեշտություն է համարում։
Ինչ վերաբերում է ՀԱՊԿ-ի հնարավոր արձագանքին, Ստանիսլավ Տարասովն ասաց՝ առանձնապես մեծ սպասելիքներ ունենալ պետք չէ․«Ի՞նչ եք սպասում ՀԱՊԿ-ից, Հայաստանի դեմ ռազմական ագրեսիա չկա, ՀԱՊԿ-ն այնտեղ անելիք չունի։ ՀԱՊԿ-ը կարող է կոնսուլտանտի, միջնորդի դեր ունենալ այս հարցում․ որպեսզի իրավիճակը ծայրահեղության չհասնի։ Իսկ ռազմական գործողություններին ակտիվ մասնակցություն ՀԱՊԿ-ը երբեք էլ չէր պատրաստվում ունենալ։ Այժմ էլ նման պլաններ չունի»,-եզրափակեց նա։
