Իրանական «Ջոմհուրի Էսլամի» օրաթերթն անդրադարձել է Հայաստանում եի Իրանում պատվաստումների խնդրին՝ գրելով. «Հայաստանում պատվաստվել ցանկացողների լուրը, մեր պատկան պատասխանատուների ճակատը պետք է ամոթի քրտինքով պարուրեր։ Իրանի գիտական հնարավորությունները և անցյալը էնքան հզոր են, որ Հայաստանը չպետք է հաշվի գար, բայց մարդիկ 15 ժամ պատվաստման հերթում սպասելուց հետո, ձեռնունայն տուն են վերադառնում, իսկ Հայաստանում անվճար պատվաստում ստանալու պայմաններ կան և Հայաստան ճամբորդել ցանկացողների հեղեղ է գոյացել։ Դեպի Երևան ավելացել են ավիաթռչքները և ավտոբուսի երթերը, մեծ հերթեր կան։ Մեր հնարավորություններից ելնելով մենք պետք է օգնության ձեռք մեկնեինք մեր հարևաններին, բայց արի ու տես ցավոք հակառակ պատկերն է»:
Այս առնչությամբ «Առաջին լրատվական»-ը զրուցել է Թեհրանում լույս տեսնող «Արաքս» շաբաթաթերթի խմբագիր Մովսես Քեշիշյանի հետ: Հարցին, թե հնարավո՞ր է պատվաստվելու նպատակով իրանահայերի հոսք լինի դեպի Հայաստան, նա պատասխանեց. «Այդ հոսքը ոչ միայն իրանահայերին է վերաբերում, այլ ընդհանրապես, իրանցիներին, որոնք մեծ խմբերով գալիս են Հայաստան, պատվաստվում ու վերադառնում են: Սա իհարկե, տարբեր մեկնաբանությունների առիթ տվեց այն առումով, որ դա կարող է օգտակար լինել Հայաստանում տուրիզմի զարգացման տեսանկյունից: Մյուս կողմից խոսակցություններ են եղել, որ իբր պատվաստանյութերի օգտագործման ժամկետն ավարտվելուն մոտ է եղել, համարել են, որ դա ոչ թե Հայաստանի կողմից տրամադրվող առավելություն կամ հնարավորություն է, այլ հնրավորություն, որ օգտագործվել է այլ նպատակով: Այդպիսի սխալ, թերի կամ տարօրինակ մեկնաբանություններ ևս հնչել են, բայց ժողովրդի կողմից արձագանքները շատ դրական են:
Իրանում բավական աշխատանք է տարվում պատվաստանյութեր պատրաստելու ուղղությամբ: Իրանում արդեն մի քանի տեսակ պատվաստանյութ է ստեղծվել, փորձնական շրջանն ավարտվել է և առաջիկա օրերին կսկսեն դրանցով պատվաստել մարդկանց»,-ասաց նա:
Քեշիշյանը տեղեկացրեց, որ Իրանում մի քանի տեսակ պատվաստանյութ է ներկրվել, այդ թվում AstraZeneca-ն, ռուսական «Սպուտնիկ V»-ն, չինական պատվաստանյութը և այլն. «Պատվաստումների կազմակերպման մեծ խնդիր կա, որովհետև ժողովրդի մեծ թվի հետ գործ ունենք: Թեև առողջապահության նախարարությունը ջանքեր է գործադրում, բայց թերություններ կան այդ առումով»:
Մովսես Քեշիշյանն ընդգծեց, որ հիմա Իրան-Հայաստան շաբաթական 11 թռիչք է իրականացվում, որից 9-ը Թեհրանից, 2-ը՝ Թավրիզից. «Գրեթե բոլոր թռիչքները լիքն է ուղևորներով: Դա խոսում է այն մասին, որ գալիս են պատվաստանյութ ստանալու Հայաստանում, որովհետև շատ արագ կարողանում են պատվաստվել ու վերադառնալ: Այս հանգամանքը բավական դրական վերաբերմունք է ստեղծել իրանցիների մոտ, բայց նաև սխալ մեկնաբանությունների տեղիք է տվել: Կարծում եմ, որ եթե հայկական կողմը կարողանա ճիշտ օգտագործել այս հանգամանքը որպես առողջապահական տուրիզմ, բավական դրական ազդեցություն դա կարող է ունենալ Հայաստանի համար»: