Ադրբեջանական ANS PRESS-ի փոխանցմամբ՝ Ադրբեջանի նախագահ Իլհամ Ալիևը Ռամադանի կապակցությամբ հանդիպում է ունեցել մուսուլմանական երկրների դեսպանների հետ և անդրադարձ կատարել Ադրբեջանի ու մուսուլմանական երկրների փոխհարաբերություններին.
«Ես շատ ուրախ եմ, որ Ադրբեջանում աճում է մուսուլմանական երկրների դեսպանատների քանակը։ Տարեցտարի այս սեղանի շուրջ նստող դեսպանների քանակն ավելանում է։ Եթե Ալլահը կամենա, մի քանի տարի անց այս կլոր սեղանը շատ ավելի մեծ կլինի։
Մենք սերտորեն համագործակցում ենք միջազգային կազմակերպություններում։ Մենք սերտորեն համագործակցում ենք և մշտապես միմյանց կաջակցենք ՄԱԿ-ի, ԻՀԿ-ի և այլ կազմակերպություններում։
Մի քանի տարի առաջ ՄԱԿ-ի Գլխավոր ասամբլեայում Լեռնային Ղարաբաղի հարցի շուրջ տեղի ունեցած քննարկումների ժամանակ մեզ ամենամեծ աջակցությունը ցուցաբերել են մուսուլմանական երկրները։ Մենք շնորհակալ ենք նրանց այդ աջակցության համար, ինչը զգում ենք նաև ներկայումս։ Ադրբեջանն էլ իր հերթին բոլոր միջազգային կառույցներում պաշտպանում է մուսուլմանական երկրների շահերը և այդպես կլինի նաև այսուհետ»։
Հիշեցնենք, որ հունիսի 28-ին Ադրբեջանի արտգործնախարար Էլմար Մամեդյարովը, Աստանայում ելույթ ունենալով Իսլամական համագործակցության կազմակերպության (ԻՀԿ, նախկին ԻԿԿ) 38-րդ նստաշրջանում, նրա անդամներին կոչ էր արել ՄԱԿ ԱԽ ժամանակավոր անդամ ընտրվելու հարցում աջակցել Ադրբեջանին.
«Ադրբեջանը 2011 թվականի ՄԱԿ-ի Գլխավոր ասամբլեայի 66-րդ նիստի ընտրություններում առաջադրել է իր թեկնածությունը՝ 2012-2013 թվականներին ՄԱԿ-ի ԱԽ ժամանակավոր անդամ դառնալու համար։
Իսլամական աշխարհին անհրաժեշտ է սեփական ներկայացուցիչն ունենալ ՄԱԿ ԱԽ-ում։ Դրա համար էլ մենք վստահ ենք, որ այդ երկրները մշտապես կաջակցեն Ադրբեջանին։
ՄԱԿ ԱԽ ժամանակավոր անդամ դառնալու թեկնածու արևելաեվրոպական երկրների թվում Ադրբեջանն այն միակ երկիրն է, որը չի հանդիսանում ԵՄ-ի անդամ և չի հարում որևէ քաղաքական կամ ռազմական դաշինքի»։
ՄԱԿ ԱԽ ժամանակավոր անդամների ընտրությունը կայանալու է այս տարվա հոկտեմբերին Նյու Յորքում։
