Ռուսաստանի և Շվեյցարիայի նախագահները քննարկել են արցախյան հարցը: Այդ տեղեկությունը ստացվել է հունիսի 7-ին: Հայտնի է, որ հունիսի 16-ին ՌԴ նախագահ Պուտինն այցելել էր Ժնև, որտեղ հանդիպեց ԱՄՆ նախագահ Բայդենի հետ: Եվ ահա, այդ հանդիպումից հետո հանդիպում Շվեյցարիայի նախագահի հետ, որի ընթացքում նաև քննարկվում է արցախյան հարցը: Իսկ դա բավականին հետաքրքիր է, հաշվի առնելով այն, որ Շվեյցարիան կարծես թե ուղիղ որևէ առնչություն չունի արցախյան հարցին, միաժամանակ առնչություն չունի դրամնով զբաղվող որևէ միջազգային կառույցի կամ ձևաչափի: Սակայն, տեղի է ունենում քննարկում, և դրանից բացի նաև հրապարակային տեղեկություն, որ եղել է արցախյան հարցի քննարկում: Սա հետաքրքիր է, հատկապես հաշվի առնելով և այն, որ արցախյան հարցում միջնորդական, կամ միջազգային որևէ այլ կառույցի ու ձևաչափի առնչություն չունեցող Շվեյցարիան ունի բավականին հետաքրքիր մեկ այլ կարգավիճակ:
Շվեյցարիան եղել է հայ-թուրքական հարաբերության ուղղությամբ երկխոսության միջնորդ, մասնավորապես այդ միջնորդությունն իրականացվել է նաև ֆուտբոլային դիվանագիտության գործընթացում: Պատահական չէ, որ հայ-թուրքական արձանագրությունները ստորագրվեցին հենց Ցյուրիխում: Շվեյցարիայի միջնորդության հանգամանքը եղել է ոչ թե ոչ ֆորմալ տեղեկատվության, այլ հրապարակային հայտարարությունների մակարդակում: Ըստ այդմ, Պուտինի և Շվեյցարիայի նախագահի քննարկումն ու արցախյան հարցի շոշափումը հետաքրքրական է դառնում հենց այդ տեսանկյունից, առաջացնելով նվազագույն հարց՝ արդյո՞ք շոշափվում է Շվեյցարիայի միջնորդական կարգավիճակը այսպես ասած ապասառեցնելու հարց, և ի՞նչ օրակարգով: Ընդ որում, հատկանշական է, որ այդ քննարկումը ծավալվում է Բայդենի հետ հանդիպումից հետո:
