Ըստ Կրեմլի խոսնակի, Ռուսաստանի ղեկավարը պատրաստվում է հանդիպման գնալ ԱՄՆ նախագահի հետ, քանի որ «Ռուսաստանի և ԱՄՆ-ի միջև վատ հարաբերություններ են»:
«Կրեմլը պատրաստ է Բայդենի հետ համատեղ մամուլի ասուլիսին: Նման հնարավորության մասին մենք լսել ենք մեր ամերիկացի գործընկերներից, սակայն դրա անցկացման վերաբերյալ որոշում դեռ չկա: Հենց սկզբից նախագահ Պուտինը բաց էր տարբեր տարբերակների համար»: Այդ մասին CNN հեռուստաալիքին տված հարցազրույցում ասել է ՌԴ նախագահի մամուլի քարտուղար Դմիտրի Պեսկովը:
Նա հավելել է,որ Պուտինը մեկնում է Ժնև, քանի որ «Ռուսաստանի և ԱՄՆ-ի հարաբերությունները վատն են», այլ ոչ թե՝ Բայդենի հետ նույն սենյակում գտնվելու համար»:
Պուտինն ու Բայդենը կհանդիպեն Ժնևում հունիսի 16-ին: 2018-ի հուլիսին Հելսինկիում Դոնալդ Թրամփի հետ Պուտինի հանդիպումից հետո սա կլինի առաջին ռուս-ամերիկյան գագաթնաժողովը: Կրեմլը հայտնել է, որ Ռուսաստանի և Միացյալ Նահանգների ղեկավարները նախատեսում են «քննարկել ռուս-ամերիկյան հարաբերությունների ներկա և հետագա զարգացման հեռանկարները, ռազմավարական կայունության խնդիրներ, ինչպես նաև միջազգային օրակարգի արդիական թեմաներ: Այդ թվում` փոխգործակցությունը կորոնավիրուսային համաճարակի դեմ պայքարում ու տարածաշրջանային հակամարտությունների կարգավորման հարցերում»։