Մեծ Բրիտանիայում այսօր մեկնարկում է «Մեծ Յոթնյակի» առաջին համաժողովը կորոնավիրուսի պանդեմիայից ի վեր: Ենթադրվում է, որ գլխավոր թեման կլինի հենց Քովիդ- 19-ի դեմ պայքարը: Աշխարհի ամենահարուստ երկրների առաջնորդները նախատեսում են 1 մլրդ դեղաչափ պատվաստանյութ հատկացնել աղքատ երկրներին: ԱՄՆ նախագահ Ջո Բայդենն արդեն հայտարարել է, որ Վաշինգտոնը Pfizer ընկերության պատվաստանյութի մոտ 500 մլն դեղաչափ կտրամադրի: Մեծ Բրիտանիայի վարչապետ Բորիս Ջոնսոնն էլ 100 մլն դեղաչափ է խոստացել: «Մեծ Յոթնյակի» առաջնորդները երեկ ոչ պաշտոնական մի հանդիպում արդեն ունեցել են, և հյուրընկալող Բորիս Ջոնսոնը հատկապես ուշադրություն է հրավիրել Ջո Բայդենի մասնակցության վրա՝ նրան անվանելով «թարմ շունչ»։
