«Այնպիսի գովազդի դեպքում, ինչպիսին ներկայացվում էր Սերժ Սարգսյանի կողմնակիցների կողմից, իրականում հրապարակված ձայնագրությունը բոլորովին տպավորիչ չէր։ Նիկոլ Փաշինյանի վերջին 3 տարիների ընթացքում դրսևորած վարքագիծը հենց դրա մասին էր։ Առանց դրա էլ պարզ էր ամեն ինչ գոնե հիմա»,-«Առաջին լրատվական»-ի հետ զրույցում ասաց Երևանի մամուլի ակումբի նախագահ Բորիս Նավասարդյանը՝ անդրադառնալով Սերժ Սարգսյանի կողմից Գեղարքունիքի մարզում հրապարակված ձայնագրությանը ։
Հիշեցնենք, որ Գեղարքունիքի մարզում երեկ ընտրողների հետ հանդիպման ժամանակ Սերժ Սարգսյանը խոստացել էր հրապարակել ձայնագրություն, որտեղ ապացուցվում է, որ Նիկոլ Փաշինյանը արցախյան հարցով բանակցությունները տարել է փակուղի։
Ձայնագրության մեջ, իհարկե, ոչ մի սկանդալային բան չկար, այնտեղ, այդ խոսակցության ժամանակ Նիկոլ Փաշինյանն ավելի շուտ արտահայտում է արցախյան հարցի վերաբերյալ նախկինում էլ հայտնած դիրքորոշումը։
«Նիկոլ Փաշինյանի վերջին երեք տարիների ընթացքում ամբողջ վարքագիծը առանց դրա էլ պարզ էր։ Այդ ձայնագրության մեջ հենց նրա վերաբերմունքն է արցախյան հարցի, Հայաստանի անվտանգության նկատմամբ։ Բայց ոչ մի զարմանալու, տպավորվելու բան չկար այդ ձայնագրության մեջ։ Այս ձայնագրությունը կարող էր նորություն լինել միայն այն մարդկանց համար, ովքեր չէին պատկերացնում, թե ինչպիսին էր 2018 թվականին ձևավոված կառավարության մոտեցումը Արցախի հարցում ։ Միայն նրանց համար կարող էր դա ինչ-որ չափով նորություն լինել։ Իսկ ովքեր հետևում են իրավիճակին, նրանց համար դա վաղուց պարզ էր։ Նիկոլ Փաշինյանը փորձեց բավական ռիսկային խաղ խաղալ արցախյան հարցում։ Դրա մասին վկայում են այն տեղեկությունները, որոնք մենք ստանում էինք վերելակային դիվանագիտության, ընդհանրապես Ադրբեջանի հետ հարաբերությունների առումով։ Այդ ռիսկային խաղը, որը միգուցե արդարացված էր և ստացվում էր ներքին քաղաքական պայքարում, բայց Արցախի հարցի դեպքում այն չէր կարող արդյունավետ լինել։ Ռիսկերն այնքան բարձր էին, որ հաջողության հասնելու շանսը դժվար թե հաշվարկելի էր։ Ու հենց դա էլ տեսանք»,-ասաց Նավասարդյանը։
Մեր զրուցակցի խոսքով՝ մինչև քարոզարշավի ավարտը դեռ ականատես կլինենք նման կոմպրոմատային պատերազմի։ Վաղուց էր պարզ, որ այս քարոզարշավի հիմնական գործիքներից մեկը հենց կոմպրոմատների տարածումն էր լիենլու։ «Բայց դեռ պարզ չէ, թե այդ կոմպրոմատները ինչ ազդեցություն կունենան քարոզարշավի վրա։ Առայժմ, այն, ինչ մենք լսում ենք, ինչի ականատես ենք լինում կողմնորոշված ընտրողների վրա ընդհանրապես որևէ ազդեցություն չեն թողնում, իսկ ովքեր կողմնորոշված չեն, ապա նրանց վրա ազդեցությունը կարող է երկակի լինել։ Բայց դեռ այնպիսի կոմպրոմատ չենք տեսել ու չենք լսել, որը կտրուկ կփոխի այս քարոզարշավի ընթացքը ու ազդեցություն կթողնի ընտրությունների վրա։
Առաջիկայում էլ նման փորձեր կլինեն, բայց թե որքանով դրանք հաջողված կլինեն, դժվար է ասել»,-ասաց Նավասարդյանը։
Անդրադառնալով քարոզարշավի ընթացքին, հնչող վիրավորանքներին, բառապաշարին, մեր զրուցակիցն ասաց, որ առկա ագրեսիվության շնորհիվ կողմնորոշված սեգմենտն ավելի է մոբիլիզացվում և ավելի հետևողական կլինի ընտրություններին մասնակցելու և քվեարկելու առումով։ Բայց այն բավական մեծ տոկոսի մասով, որը դեռ կողմնորոշված չէ և չգիտի՝ մասնակցելու է ընտրությանը, թե ոչ, ապա այդ սեգմենտի վրա ագրեսիվ քարոզարշավի ազդեցությունը միանշանակ չէ և լրացուցիչ անորոշության, հիասթափության և անգամ նողկանքի զգացում է առաջացնում։