Թաիլանդում հունիսի 7-ից մեկնարկել է երկար սպասված զանգվածային պատվաստումների գործընթացը, հաղորդում է The Guardian պարբերականը։ Երկիրը պայքարում է կորոնավիրուսի երրորդ ալիքի դեմ, որին այս պահի դրությամբ բաժին է ընկնում ընդհանուր վարակման դեպքերի 80 տոկոսը։
Ըստ պաշտոնական տվյալների՝ Թաիլանդում այսօր արձանագրվել է կորոնավիրուսի 2419 նոր դեպք, վիրուսից մահվան 33 դեպք։ Ընդհանուր վարակվածների թիվը հասել է 179 886-ի, որոնցից 1269-ը՝ մահվան ելքով։
Թաիլանդցիները կպատվաստվեն տեղում արտադրված AstraZeneca ընկերության և Չինաստանից ներմուծված Sinovac ընկերության պատվաստանյութերով։
Ըստ Թաիլանդի վարչապետի՝ կառավարությունն այնպես կանի, որ երկրի ամբողջ բնակչությունը պատվաստվի։ Նախատեսվում է Թաիլանդի 66 միլիոնանոց բնակչության 70 տոկոսին պատվաստել մինչև այս տարվա վերջը։
Պատվաստանյութի առաջին դեղաչափն առայժմ ստացել է 2,8 միլիոն մարդ, որոնք ներկայացնում են խոցելի խմբերը, այդ թվում՝ բուժաշխատողները, տրանսպորտի ոլորտի աշխատողները։
