«Այսօր ակնհայտ է, որ գնալով՝ Ադրբեջանի ռազմական ագրեսիան մեծանում է: Մեդվեդևի հայտարարության հիմքում ընկած էր այն փաստը, որ ագրեսիան բերեց Աբխազիայի և Հարավային Օսիայի ճանաչմանը, և նրա մեսիջը նշանակում է, որ կողմերից ցանկացածի կողմից խաղաղության խախտումը կբերի հակառակ կողմի դիրքերի պաշտպանությանը Ռուսաստանի կողմից»,- լրագրողների հետ հանդիպման ժամանակ խոսելով Մեդվեդևի այն հայտարարության մասին, թե 2008 թ. պատերազմը պետք է «մեծ դաս» լինի Հայաստանի և Ադրբեջանի համար՝ կարծիք հայտնեց քաղաքագետ Հրանտ Մելիք-Շահնազարյանը:
Նա նշեց, որ այսօր Ադրբեջանին բարկացնում է նաև այն հանգամանքը, որ Արցախն ինչ-որ ճանաչում ունի, և նույնիսկ խոսք է գնում բանակցությունների ձևաչափի փոփոխության մասին, ինչն էլ նշանակում է Արցախի մասնակցություն բանակցային գործընթացում. «Սա ավելի ու ավելի է Բաքվին նեղում, և, բնականաբար, նրանք փորձում են հարցը քաղաքականից փոխել զգացմունքային և քարոզչական դաշտ»:
Ռազմական փորձագետ Արծրուն Հովհաննիսյանն էլ նշեց, որ Մեդվեդևի հայտարարությունն իր բնույթով նորություն չէ, և ամբողջ աշխարհն էլ շատ լավ դաս է քաղել 2008 թ. պատերազմից հետո. «Կոնկրետ հայտարարությունը վերջնագիր է Ադրբեջանի միլիտարացման քաղաքականությանը` հստակ մեսիջ Մոսկվայից, որ չի կարելի շանտաժի մեթոդով գալ բանակցությունների»:
Այդուամենայնիվ, Հովհաննիսյանը նաև նկատեց, որ այդ հայտարարությունը տարօրինակ էր այն առումով, որ Ռուսաստանը համարվում է Ադրբեջանի համար զենքի շատ լուրջ մատակարար: Սակայն, ըստ փորձագետի, դա թեև քաղաքականության մեջ գործոն է, սակայն ոչ գլխավորը:
Արծրուն Հովհաննիսյանը խոսեց նաև Մեդվեդև-Ալիև հանդիպումից առաջ տարածված այն տեղեկատվության մասին, թե Ադրբեջանը ցանկանում է ԱՄՆ-ից զենք գնել:
«Պատահական չեմ համարում, որ այս լուրը տարածվեց Մեդվեդևի հետ հանդիպումից առաջ, և պետք է հատուկ շեշտեմ, որ սա ադրբեջանական հերթական բազմակոմբինացիոն քայլն է, որը քաղաքական շարժառիթներ ունի Ռուսաստանի հետ հարաբերություններում լուրջ խաղաքարտեր ստանալու առումով։ Իսկ ռազմական տեսանկյունից այս լուրն աբսուրդ է, որովհետև նշվում էր, թե Ադրբեջանը ցանկանում է գնել հակաօդային և հակատանկային պաշտպանական զենքեր, ինչի կարիքն Ադրբեջանը բացարձակապես չունի»,- կարծիք հայտնեց Հովհաննիսյանը:
Նա նաև հավելեց, որ Միացյալ Նահանգները երբեք նման խնդրահարույց պետություններին զենք չի վաճառել:
