Ադրբեջանական ANS PRESS-ի փոխանցմամբ՝ Սոչիում մեկնարկել է Ռուսաստանի ու Ադրբեջանի նախագահներ Դմիտրի Մեդվեդևի ու Իլհամ Ալիևի հանդիպումը։ Մեդվեդևն Ալիևի հետ քննարկում է երկկողմանի հարաբերություններին առնչվող հարցերի լայն շրջանակ, Լեռնային Ղարաբաղի հակամարտության կարգավորումը, ինչպես նաև տնտեսական ուղղվածություն ունեցող համաշխարհային հարցեր։
Հանդիպման ժամանակ Մեդվեդևն Ալիևին հայտնել է. «Իհարկե, օրակարգի կարևորագույն թեմաներից մեկը ղարաբաղյան հակամարտության կարգավորումն է։ Ես կցանկանայի Ձեզ հետ չափազանց անկեղծ խոսակցություն ունենալ, թե ի՞նչ է պետք անել հետագայում, ինչպե՞ս կընթանան իրադարձությունները՝ հաշվի առնելով Կազանի եռակողմ և նախորդ հանդիպումները»։
Ալիևն իր հերթին շնորհակալություն է հայտնել Մեդվեդևին՝ Սոչի հրավիրելու համար։ Ալիևն ընդգծել է, որ երկկողմանի հարաբերությունները զարգանում են բոլոր ուղղություններով, նկատվում է դրական դինամիկա։ Ալիևը Մեդվեդևին շնորհակալություն է հայտնել ղարաբաղյան հակամարտության կարգավորման գործընթացում ունեցած ջանքերի համար.
«Անցկացված բանակցությունները բավական մոտեցրել են կողմերի դիրքորոշումները։ Ղարաբաղյան հակամարտությունը տարածաշրջանային անվտանգության գլխավոր խնդիրն է։ Հնարավոր է՝ Ադրբեջանն ամենաշատն է շահագրգռված ղարաբաղյան հակամարտության կարգավորման հետ»։
