Հունիսի 20-ի արտահերթ խորհրդարանական ընտրությունների նպատակով վարչապետ Նիկոլ Փաշինյանն ապրիլի 25-ին հրաժարական տվեց։ Իր ուղերձում Փաշինյանը բացատրել է, որ արտահերթ խորհրդարանական ընտրություններ հնարավոր է անցկացնել միայն մեկ պարագայում, երբ ինքը հրաժարական տա, ու խորհրդարանը երկու անգամ չընտրի վարչապետի թեկնածու։
«Խորհրդարանական մեծամասնությունը վարչապետ չի ընտրի, և Ազգային ժողովը կհամարվի արձակված, ու կնշանակվեն արտահերթ խորհրդարանական ընտրություններ», -հայտարարել է նա:
Չնայած այն բոլոր կանխատեսումներին, թե արտահերթ ընտրություններ հնարավոր է չկայանան, քաղտեխնոլոգ Արմեն Բադալյանը կարծում է, որ դրանք կանցկացվեն հենց նշված ժամկետում.«ԱԺ նախագահն արդեն ստորագրել է ընտրությունների անցկացման մասին համապատասխան օրենքը, «Բարգավաճ Հայաստան» և «Լուսավոր Հայաստան» կուսակցություններն էլ արդեն հայտարարել են, որ վարչապետի հրաժարականից հետո վարչապետի թեկնածու չեն առաջադրելու, Ազգային ժողովն էլ հրաժարականից 14 օր հետո իրավունքի ուժով լուծարվելու է։ Ինչպես հասկանում ենք ընտրությունները տեղի են ունենալու, դրա համար կար թե՛ ներքին և թե՛ արտաքին պահանջ»,-«Առաջին լրատվական»-ի հետ զրույցում ասաց նա։
Ներքին պահանջն, ըստ Բադալյանի, «Հայրենիքի փրկության շարժման» գործողություններ էին. «Նրանք իհարկե մեծ բան էին պահանջում՝ իրենց կողմից առաջադրած ժամանակավոր վարչապետի մեկ տարի պաշտոնավարում, հետո նոր ընտրություններ։ Դրան չհասան, բայց փոխարենը հասան միայն արտահերթ խոհրդարանական ընտրությունների։ Կար նաև դրսից պահանջ։ Գաղտնիք չէ, որ թե՛ Ռուսաստանից և թե՛ Արևմուտքից պահանջում էին, որ այս իշխանությունները անցկացնեն արտահերթ ընտրություններ, որպեսզի հասկանան, թե ի վերջո վարչապետի կողմից իրականացվող քաղաքականությունը հասարակության կողմից ընդունելի է, թե մերժելի։ Եվ ընդհանրապես հեղափոխական էյֆորիայի ավարտից ու պատերազմից հետո քաղաքական գործիչն ի՞նչ կշիռ ու ազդեցություն ունի։ Այսօրվա դրությամբ կարող ենք ասել, որ եթե որևէ բան չփոխվի, ապա 99.9 տոկոսով արտահերթ ընտրությունները կկայանան»։
Մեր այն դիտարկմանը,թե երկրորդ նախագահ Ռոբերտ Քոչարյանը հայտարարել է, որ երբ վարչապետը հրաժարական տա, իրենք հաջորդ օրվանից կսկսեն իրենց գործողությունները և հարցին, թե որո՞նք կարող են լինել այդ գործողությունները, Բադալյանն արձագանքեց.«Հասկանալի է, որ հիմա դե ֆակտո նախընտրական արշավը սկսվել է։ Օրենքն այնպես է, որ երկրորդ նախագահը կարող է ինչ-որ գործողություններ իրականացնել ու ասել, որ այն նախընտրական բնույթ չունի։ Ի վերջո նա երկորրդ նախագահ է և կարող է դա անել, կուսակցությունները ևս կարող են իրենց ընտրողների հետ հանդիպել։Օրենքը չի արգելում, որ կուսակցության ղեկավարները իրենց ընտրողների հետ հանդիպեն։ Երկրորդ նախագահի ասածն էլ նշանակում է, որ ավելի հստակ կլինի հարցը՝ արդյոք մենք հունիսի 20-ին գնում են արտահերթ ընտրությունների, հակառակ դեպքում, վարչապետը հրաժարական չէր տա»։
Մեր զրուցակիցը կարծում է, որ ձևավորվելիք նոր խորհրդարանը կտարբերվի գործող խորհրդարանից.«Այնպես չէ, որ խորհրդարանում եղած ուժերից ոչ մեկ խորհրդարանում չի հայտնվի և բոլորովին նոր ուժեր կգան։ Չենք կարող ասել, որ 100 տոկոսով կփոխվի կառուցվածքը։Բնականաբար ԲՀԿ-ն կլինի, Քաղպայմանագիրն էլ՝ վարչապետի գլխավորությամբ կլինի, նաև՝ երկրորդ նախագահի կողմից ձևավորվող դաշինքը, կարող են լինել երկու-երեք այլ ուժեր ևս։Չենք կարող ասել, թե ինչ հարաբերակցությամբ՝ դա արդեն ցույց կտա ընտրարշավը։ Այս պահի դրությամբ չգիտենք,թե Հանրապետական կուսակցությունը մասնակցելու է, թե ոչ, չգիտենք նաև, թե Հայաստանի արևմտամետ հատվածի շահերը որևիցե քաղաքական ուժ կկարողանա ակումուլացնել իր վրա ու ներկա գտնվել խորհրդարանում։ Կոնֆիգուրացիան դեռ հայտնի չէ, պաշտոնապես հստակ չէ, թե որ ուժերն են մասնակցելու ընտրությունների։ Կան մի քանի նորաստեղծ կուսակցություններ, բայց թե ինչ հաջողություններ կգրանցեն՝ չեմ կարող ասել»։
Քաղտեխնոլոգը կասկածում է , որ որևէ ուժ կակրողանա 50+1 տոկոս ձայն ստացնալ։