Բելառուսի նախագահ Ալեքսանդր Լուկաշենկոն ասել է, որ Ուկրաինայի նախկին նախագահ Պետրո Պորոշենկոյին է փոխանցել Դոնբասի վերականգնման հետ կապված Ռուսաստանի ղեկավար Վլադիմիր Պուտինի առաջարկները, բայց նա հրաժարվել է, հաղորդում է «Sputnik Բելառուս»-ը:
Բելառուսի ղեկավարը կարծիք է հայտնել, որ «և՛ մեկը, և՛ մյուսը ցանկանում են փրկել իրենց դեմքը», բայց Ռուսաստանը հսկայական երկիր է, որը կարող է օգնել շատերին, նաև Ուկրաինային՝ կապված Դոնբասում տիրող իրավիճակի հետ:
«Նման առաջարկներ եղել են Պուտինի կողմից: Նա ինձ խնդրեց դրանք փոխանցել Պորոշենկոյին: Ես արեցի դա»,- ասել է Լուկաշենկոն:
Նրա խոսքով, այդ ժամանակ նա «առաջին անգամ միանշանակ հասկացավ, որ ուկրաինացի քաղաքական գործիչները, երկրի ղեկավարությունն անկախ չեն»:
«Որովհետև անհրաժեշտ էր որոշումներ կայացնել և քայլ առ քայլ առաջ շարժվել: Եվ հիմա արդեն շատ հարցեր լուծված կլինեին… Բայց ես վկա էի: Դրանում Պուտինը չէ մեղավոր»,- ամփոփել է Բելառուսի ղեկավարը՝ հավելելով, որ առաջարկները լավն էին, բայց Պորոշենկոն հրաժարվեց դրանցից:
Ապրիլի սկզբին Եռակողմ շփման խմբում (TCG) ուկրաինական պատվիրակությունը որոշեց հրաժարվել Մինսկից, որը երկար ժամանակ Դոնբասում հակամարտության կարգավորման բանակցությունների հարթակ էր հանդիսանում: Ուկրաինայի փոխվարչապետ Ալեքսեյ Ռեզնիկովի խոսքով, Կիևի ներկայացուցիչները կտրականապես հրաժարվում են Մինսկում առերես խորհրդակցությունների վերսկսումից, եթե կարանտինը հանկարծ ավարտվի, և համապատասխան առաջարկ լինի:
