Ադրբեջանական Salam News գործակալության փոխանցմամբ, Թուրքիայի նախագահ Աբդուլլահ Գյուլը ճապոնական «Նիքքեյ» խոշորագույն տնտեսական թերթին տված հարցազրույցի ժամանակ խոսել է Թուրքիայի արտաքին քաղաքականության նպատակների, Կենտրոնական Արևելքում «արաբական գարնան» և ժողովրդավարացման առաջխաղացման մասին։
«Տարածաշրջանային առաջնորդության նկատմամբ Թուրքիայի վերելքը» խորագրով հոդվածում Գյուլը նշել է Թուրքիայի գործունեության ուղղվածության մասին. «Մենք ունենք այնպիսի պետական կարգ, որը պատմական ու աշխարհագրական տեսնակյունից ի վիճակի է իր վրա վերցնել տարածաշրջանային առաջնորդի դերը, և համեմատած անցյալի հետ՝ վերջին տարիներին իր վրա է վերցրել ավելի պատասխանատու առաջադրանքներ։
Հանուն արտաքին քաղաքական ու տնտեսական հաջողությունների՝ մենք փորձում ենք ամրապնդել մեր կապերը բոլոր տարածաշրջանների ու մայրցամաքների հետ։ Ոմանք դա չեն հասկանում, կամ դժվարանում են հասկանալ։
Թուրքիան մեծ երկիր է, և ԵՄ-ին նրա անդամակցելը մշտապես հարուցել է ազդեցիկ երկրների մտահոգությանը։ ԵՄ-ում մի շարք նեղմիտ քաղաքական գործիչներ այդ հարցն օգտագործում են ներքաղաքական խնդիրների լուծման համար։ Իմ ղեկավարած երկիրը Եվրոպայի մի մասն է և այն ավելացնում է իր եվրոպական ինտեգրումը։
Ողջ Կենտրոնական Արևելքն է հետևում Թուրքիային ու ոգևորվում նրա հաջողություններից։ Յուրաքանչյուր երկիր ունի իր մոդելը։ Մերձավոր Արևելքի արաբական երկրները ոգևորվում են թուրքական ժողովրդավարական մոդելից։ Թուրքիան ոչ միայն մուսուլմանական երկիր է, այլև՝ իրական ժողովրդավարություն, տնտեսական հաջողություններ, ուժեղ բանակ և օրենքի գերակայություն ունեցող երկիր է»։
Հիշեցնենք, որ շատ փորձագետների կարծիքով, արաբական երկրները փորձում են կրկնօրինակել թուրքական մոդելը, քանի որ այն իրենից ներկայացնում է իսլամի ու ժողովրդավարության հաջող խառնուրդ։
