Թուրքիայի ռազմական ինքնաթիռները 400 թռիչք են իրականացրել Հունաստանի տարածքի վրայով, ինչն իրավական տեսանկյունից անթույլատրելի է: Այս մասին Անկարայում հայտարարել է Հունաստանի ԱԳՆ ղեկավար Նիկոս Դենդիասը՝ թուրք գործընկեր Մևլութ Չավուշօղլուի հետ համատեղ մամուլի ասուլիսում: Նախարարների ելույթները, որոնցում մի շարք փոխադարձ մեղադրանքներ են հնչել, ուղիղ հեռարձակվել է հունական ERT-1 հեռուստաալիքով:
Հունաստանի արտգործնախարարը բարձրացրել է Էգեյան ծովում թուրքական սադրանքների հարցը, ինչպես նաև պատասխանել է Չավուշօղլուի հայտարարությանը Հունաստանի Թրակիա շրջանում թուրքական փոքրամասնության մասին, որոնց Աթենքում մահմեդական փոքրամասնություն են անվանում: «Եթե դուք այդպիսի սադրիչ մեղադրանքներ եք առաջադրում, ապա ես պետք է պատասխանեմ,- ասել է Դենդիասը: – Թուրքիան 400 թռիչք է իրականացրել Հունաստանի տարածքի վրայով: Մևլութ, Հունաստանի տարածքի վրայով թռիչքները (թուրքական ռազմական ավիացիայի) թույլատրող որ մի իրավական դրույթ չկա: Եթե Թուրքիան ցանկանում է անդամակցել ԵՄ-ին, ապա պարտավոր է միանալ ՄԱԿ-ի ծովային իրավունքի կոնվենցիային, որը ստորագրել է նաև Եվրամիությունը»:
