«Շատ կարևոր է, որ ԳՇ-վարչապետ հակադրության հետ կապված ճգնաժամն ավարտվեց. բացառվեց բանակի մասնակցությունը ներքաղաքական պրոցեսներին, դա նշանակում է, որ մենք շանս ունենք զարգանալու»,- այս մասին «Առաջին լրատվական»-ի հետ զրույցում նշեց քաղաքագետ Ստեփան Գրիգորյանը:
Քաղաքագետի խոսքով՝ արտահերթ ընտրությունները քաղաքական ճգնաժամը հաղթահարելու համար լավ տարբերակ են. «Բայց եթե և՛ արտախորհրդարանական, և՛ խորհրդարանական ընդդիմությունը դեմ է արտահերթ ընտրություններին, Նիկոլ Փաշինյանին զոռով ստիպե՞նք գնալ արտահերթ ընտրությունների: Ես չեմ տեսնում, որ ընդդիմությունն ուզում է գնալ արտահերթ ընտրությունների»:
Անդրադառնալով դիտարկմանը, որ այդ դեպքում Հայաստանում անկայունությունը կպահպանվի, Գրիգորյանը նշեց, որ գլխավոր հարցն այն է, թե ում է ձեռնտու այդ անկայունությունը. «Իմ կարծիքով՝ դա ձեռնտու է Ռուսաստանին, և նրա 5-րդ շարասյանը Հայաստանում, և այդ լարվածությունը պահում են»:
Ստեփան Գրիգորյանն անդրադարձավ նաև Սերգեյ Կուրղինյանի հետևյալ արտահայտությանը. «Մենք չենք կարող թույլ տալ հայերի հաղթանակը Արցախում, այլապես կկորցնենք Կովկասը, այնուհետև ողջ Ռուսաստանը»: Քաղաքագետը նշեց, որ մենք՝ հայերս, չպետք է խաբվենք հայկական ազգանվանը. «Այդ մարդը ՌԴ քաղաքացի է, և այսօր շատերը, որոնք Հայաստանի դեմ կամպանիա են տանում մեդիահոլդինգներից, չգիտենք՝ նրանք ՌԴ հատուկ ծառայությունների հետ կապ ունեն, թե չունեն, ում շահերն են պաշտպանում: Մեր ժողովուրդը մի քիչ միամտություն ունի՝ կարծում է, որ եթե հայ է, ուրեմն լավն է: Այո, հայերի գերակշռող մեծամասնությունը Սփյուռքում պրոհայկական է, Հայաստանը սիրում է և հայրենիքի համար իր կյանքը կտա, բայց կան նաև այնպիսինները, որոնք օտարերկրյա հատուկ ծառայությունների հետ կապ ունեն: Կան մարդիկ, որոնք սպասարկում են Ռուսաստանի շահերը: «Յան» ազգանվանը չպետք է խաբվել. Կուրղինյանը պուտինյան գաղափարախոսության կողմնակիցն է, կտրված է հայրենիքից, ես համոզված չեմ, որ նա իրեն հայ է զգում: Մոսկվան կուրղինյաններին օգտագործում է մեր դեմ: Հայաստանում կա 5-րդ շարասյուն՝ Հայաստանի քաղաքացիներ և հայաստանյան ԶԼՄ-ներ, որոնք սպասարկում են ՌԴ շահերը: Նրանց նպատակը հասարակությանն ապակողմնորոշելն է, թե ով օտարեց ԼՂ-ն: Նրանք ազգի դավաճան են»:
Մանրամասն՝ տեսանյութում:
