Բրազիլական ֆուտբոլի լեգենդ Պելեն կարող է վերադառնալ խաղադաշտ՝ «Սանտոս»-ի կազմում աշխարհի ակումբային առաջնությանը մասնակցելու համար:
Այն մասին, որ Պելեն կարող է խաղալ աշխարհի ակումբային առաջնությունում՝ հայտարարել են բրազիլական ակումբի նախագահ Լուիս Ալվարո Ռիբեյրոն և մարքեթինգի տնօրեն Արմեյո Նետոն: Երկու ղեկավարներն էլ նշել են, որ ամեն ինչ կախված է «Սանտոս»-ի գլխավոր մարզիչ Մուրիսի Ռամալոյի որոշումից:
Նետոն կարծում է, որ Պելեի և Մեսսիի մասնակցությունը մեկ խաղում մեծ հետաքրքրություն է առաջացրել երկրպագուների շրջանում, ինչը կարող է անչափ եկամտաբեր լինել:
«Անհնար ոչինչ չկա: Դեռ պետք է համաձայնության գալ գլխավոր մարզիչ Մուրիսի Ռամալոյի հետ, սակայն եթե Պելեն կարող է լիցք հաղորդել թիմին, ապա` ինչո՞ւ ոչ»,- Նետոյի խոսքերն է մեջբերում Eurosport-ը:
«Սանտոս»-ի նախագահի խոսքերով, Պելեն չի կարողանա մասնակցել ամբողջ հանդիպմանը, սակայն կարող է օգտակար լինել հետխաղյա 11-մետրանոց հարվածաշարի ժամանակ:
«Հարկավոր է սպասել Ռամալոյի որոշմանը: Եթե անգամ Պելեն պատրաստվի խաղին, ապա չի կարողանա մասնակցել ամբողջ հանդիպմանը, սակայն 11-մետրանոց հարվածաշարի ժամանակ նա կարող է օգնել «Սանտոս»-ին »,- Հայտարարել է Ռիբեյրոն:
70-ամյա Պելեն արդեն սկսել է մարզվել, որ լավ մարզավիճակ ձեռք բերի մինչև մրցաշարի մեկնարկը: Հիշեցնենք, որ աշխարհի ակումբային առաջնությունը տեղի կունենա դեկտեմբերին, Ճապոնիայում: