ՀՀԿ ներկայացուցիչը հաստատել է տեղեկությունը, որ երկրորդ և երրորդ նախագահների մասնակցությամբ եղել է Հայրենիքի փրկության շարժման մի քանի առաջատար ուժերի ղեկավարների և միասնական թեկնածու Վազգեն Մանուկյանի հետ հանդիպում: Հանդիպման մանրամասներ հայտնի չեն: Հատկանշական է, որ հանդիպումը տեղի է ունեցել Ռոբերտ Քոչարյանի հայտնի հայտարարությունից հետո՝ որ սխալ կլինի չմասնակցել իշխանության կազմակերպած արտահերթ ընտրությանը, ինչպես նաև Ռոբերտ Քոչարյանի Մոսկվա կատարելիք այցից առաջ, որը տեղի է ունենալու փետրվարի 3-8-ը: Նա մեկնում է «Սիստեմա» ընկերության տնօրենների խորհրդի նիստին մասնակցելու համար, սակայն կասկած չկա, որ փորձելու է ունենալ նաև քաղաքական շփումներ:
Ի դեպ, մեկ այլ ուշադրության արժանի հանգամանք է թերևս այն, որ մի քանի շաբաթ առաջ Ռոբերտ Քոչարյանը նույնպես մեկնել էր Մոսկվա և այդ այցի ընթացքում եղել էր հեռախոսազրույց Վլադիմիր Պուտինի հետ: Ի՞նչ «քեյսով» է Ռոբերտ Քոչարյանը Մոսկվա մեկնում այս անգամ: Ակնառու է Ռոբերտ Քոչարյանի և Հայրենիքի փրկության շարժում խմբավորման տարակարծության առնվազն մեկ լուրջ դրվագ, գոնե առայժմ: Խոսքը հենց արտահերթ ընտրության հարցում վերաբերմունքի մասին է: Խմբավորումը դրել էր վարչապետ Փաշինյանի հրաժարականի միարժեք պահանջ և Վազգեն Մանուկյանի գլխավորությամբ ժամանակավոր կառավարության ձևավորման խնդիր:
Ռոբերտ Քոչարյանը փաստորեն հայտարարել է այդ տարբերակից հրաժարվելու մասին, ասելով, թե պետք է մասնակցել այս կառավարության կազմակերպած ընտրությանը: Ամբողջ հարցն այն է, որ Ռոբերտ Քոչարյանն այդ դիրքորոշման է Հայրենիքի փրկության շարժում խմբավորման հանդեպ իր առավելության գիտակցումով:
Ակնառու է, որ այդ շրջանակում, կամ այսպես ասած նախկին կառավարող համակարգը ներառող շրջանակում Ռոբերտ Քոչարյանը առաջատարի դիրքում է գրեթե բոլոր առումներով: Երբ երկրորդ նախագահը հայտարարում է, թե իր թիմով կմասնակցի ընտրությանն ու «կկրի»՝ կհաղթի, նա առաջին հերթին նկատի ունի հենց ՀՓՇ խմբավորման մյուս ուժերի հանդեպ ունեցած առավելությունը: Նրանք կամ ստիպված են լինելու հայտնվել Ռոբերտ Քոչարյանի կամքի ներքո, կամ հայտնվել նրա դեմ, որտեղ նրանց ձախողումը երաշխավորված է: Այդ դեպքում Ռոբերտ Քոչարյանն առնվազն կամրագրի խորհրդարանի երկրորդ ուժի միանձնյա տեղը, հետագայում այն ամրացնելու և այսպես ասած բյուրեղացնելու ակնկալիքով:
Բարդ է պատկերացնել, որ դեռևս նախագահ եղած շշրջանում իշխանությունը Ռոբերտ Քոչարյանին հետ չփոխանցելու համար գրեթե ամեն ինչ արած, անգամ հեղափոխություն խթանած Սերժ Սարգսյանը կարող է համակերպվել Ռոբերտ Քոչարյանի կամքի ներքո հայտնվելու մտքի հետ: Խոսքն իհարկե ոչ թե անձամբ, այլ ՀՀԿ ձևաչափով այդ դիրքում հայտնվելու հանգամանքի մասին է: Այդ իմաստով ստեղծվում է բավականին հարաբերական իրավիճակ, երբ Սերժ Սարգսյանը չունի Ռոբերտ Քոչարյանի առավելությունը չեզոքացնելու բավարար ռեսուրս, մյուս կողմից սակայն Ռոբերտ Քոչարյանի համար չափազանց բարդ է Սերժ Սարգսյանին չեզոքացնելու, նրանից ազատվելու խնդիրը:
