Զգուշացնում եմ Փաշինյանին առաջիկա հանդիպմանը չմեկնել Մոսկվա

Մամուլում այս օրերին դեռևս չհերքվող տեղեկություններ են շրջանառվում այն մասին, որ առաջիկայում Մոսկվայում եռակողմ բարձրաստիճան հանդիպում է կայանալու Հայաստանի, Ադրբեջանի և Ռուսաստանի ղեկավարների մասնակցությամբ, որը կլինի Փաշինյան-Ալիև առաջին հանդիպումը պատերազմից հետո։ Չի հերքվել նաև տեղեկությունը, որ Փաշինյանն առաջիկայում այցելելու է Մոսկվա։

Ռուսական «Ինտերֆաքս»-ը, հղում կատարելով իր աղբյուրներին, հայտնել է նման հանդիպման մասին՝ նշելով, որ այն կկայանա ամանորյա արձակուրդներից հետո, հավանական ամսաթիվ է նշվում հունվարի 11-ը։ Հավելենք, որ  մինչ տոները  ՀՀ ԱԱԾ տնօրեն Արմեն Աբազյանը մեկնել էր Մոսկվա։ Վերջինիս այցի բովանդակության վերաբերյալ մամուլում մի շարք տեղեկություններ  են  շրջանառվում: Թեմայի շուրջ «Առաջին լրատվական»-ը զրուցել է քաղաքագետ Ստեփան Գրիգորյանի հետ:

«Մեր կառավարությունը թափանցիկ չի աշխատում, պաշտոնապես ոչինչ չի ասվում»,- նշեց Ս. Գրիգորյանը՝ հավելելով, որ քանի որ ինֆորմացիա չեն տալիս, ստիպված նաև ադրբեջանական մամուլին է հետևում, լսում է նաև Ալիևին և փորձում եզրակացություններ անել: Քաղաքագետի կարծիքով՝ պետք է հայտարարվի, թե ինչ հարցերի շրջանակ է քննարկվելու մոսկովյան հանդիպման ընթացքում:

«Եթե Մոսկվայի հանդիպման օրակարգը չի հանրայնացվում, ուրեմն մեզ համար խնդիրներ կան: Եթե մեզ հետ հաշվի չեն նստում, ուրեմն մենք Մոսկվայի գրպանում ենք»,- ընդգծեց Գրիգորյանը՝ հավելելով, որ ճակատագրական հարցերի վերաբերյալ մեկ անձ չպետք է որոշում կայացնի»:

Քաղաքագետի դիտարկմամբ՝ այժմ ռուս-ադրբեջանական առևտուր է գնում. «Ռուսաստանը տվեց Շուշին, որ Ադրբեջանը մտնի ԵԱՏՄ: Իսկ Ադրբեջանն ուզում է ամբողջ Ղարաբաղը»:

Ստեփան Գրիգորյանը կարծիք հայտնեց, որ եթե առաջիկայում Մոսկվայում եռակողմ հանդիպում կայանա, դա ձեռնտու կլինի միայն Ադրբեջանին և Ռուսաստանին, իսկ Հայաստանին այդ հանդիպումը ոչինչ չի տա: Նրա խոսքով՝ Ռուսաստանը օգտվում է Հայաստանի թույլ վիճակից: «Մեզ համար վտանգավոր կլինի ինչ-որ բան՝ պայմանագիր կամ համաձայնագիր ստորագրելը… Ալիևն իր ժողովրդին խոստացել է, որ փետրվարի 1-ին Ստեփանակերտում կծածանվի իրենց դրոշը: Ալիևը շտապում է… Զգուշացնում եմ Փաշինյանին, որ Մոսկվան ու Բաքուն ուզում են օրինական փաստաթուղթ պոկել. այս հայտարարությունը փաստաթուղթ չէ: Զգուշացնում եմ Փաշինյանին՝ չմեկնել առաջիկա հանդիպմանը: Անօրինական պրոցես է ընթանում Փաշինյանը պետք է զգույշ լինի»,- ընդգծեց քաղաքագետը:

Մանրամասները՝ տեսանյութում;