«Ես ինքս չգիտեմ, թե Տեր-Պետրոսյանի գոյություն չունեցող բարձունքից ինչպես է երևում քաղաքական դաշտը և այդ դաշտում ով որտեղ է գտնվում, բայց «Ժառանգությունն» իրեն երբեք լուսանցքում չի զգացել և չի զգում»,- «Առաջին լրատվականի» հետ զրույցում անդրադառնալով ՀԱԿ առաջնորդ Լևոն Տեր-Պետրոսյանի երեկվա ելույթին՝ կարծիք հայտնեց ԱԺ «Ժառանգություն» խմբակցության ղեկավար Ստեփան Սաֆարյանը:
Հիշեցնենք, որ երեկվա հանրահավաքում Լևոն Տեր-Պետրոսյանը նշել էր, որ երկխոսությունը տեղի է ունենում Հայաստանի երկու գլխավոր քաղաքական ուժերի՝ կոալիցիոն իշխանության և Հայ ազգային կոնգրեսի միջև և քաղաքական գործընթացների վրա ազդեցություն չունեցող, հետևաբար քաղաքական գործոն չհանդիսացող տարրերը, երկխոսությունից դուրս մնալու համար, իրենցից բացի, թող ոչ ոքի չմեղադրեն և վերջապես գիտակցեն, որ քաղաքական գործոն դառնում են ոչ թե խոսքով, այլ գործով. «Այդ տարրերին բարեկամաբար կհորդորեի զերծ մնալ երկխոսությանը խանգարելուց, որովհետև դրանով նրանք ոչ թե մեզ, այլ երկրին ու ժողովրդին են վնասում, ինչը կարող է պատճառ դառնալ նրանց վերջնական մարգինալացման»:
Սաֆարյանը շեշտեց, որ քաղաքական ուժին որևէ մեկը ամենամեծ ցանկության դեպքում անգամ չի կարող դուրս մղել քաղաքական դաշտից, եթե այդ քաղաքական ուժն ինքը իրեն չի մատնել այդ ճակատագրին և անգործության. «Ժառանգությունն այն քաղաքական ուժերից է, որն ազդում է և՛ քաղաքական մյուս ուժերի դիրքորոշումների վրա, և՛ քաղաքական օրակարգի վրա, և՛ քաղաքական դաշտի եզակի քաղաքական ուժերից մեկն է, որն անգերազանցելի է հանրային քաղաքականություն վարելու առումով, ու այս առումով հավասարը ես չգիտեմ»:
Սաֆարյանը նշեց, որ «Ժառանգությունը» մտահոգություններ ունի «երկխոսություն» կոչվածի հետ կապված միայն այն պատճառով, որ դա իրենց համար ուրվագծվում է որպես կոալիցիոն հուշագրի հավելված, որտեղ իշխանությունը լուծած համարելով իր խնդիրը ապագա մեծամասնության կազմավորման հարցում ուղղակի նպատակ է հետապնդում նաև ընդդիմությանը ճանաչել տալ այդ արդյունքները.
«Ցավոք սրտի, ՀԱԿ-ը մտել է այդ գործընթացների մեջ, և «Ժառանգությունը» մտահոգություն ունի այն պատճառով, որ խոսքը վերաբերում է ընտրություն կոչված միջոցառումը քաղաքական ուժերից մեկի հետ համատեղ ոչնչացնելուն և քաղաքացուն ընտրության հնարավորությունից զրկելուն: Եթե ՀԱԿ-ը, լինելով դրա մեջ, չի տեսնում գործընթացի նման ուղղվածությունը, ապա մեր համար կողքից ակնհայտ է, որ երկխոսությունը կոալիցիոն հուշագրի հավելվածն է»:
