Շոգն աննորմալ չէ, երևույթն աննախադեպ չէ: Նման երևույթներ մեր հանրապետության տարածքում պարբերաբար կրկնվում են, քանի որ հանրապետության տարածքը գտնվում է մերձարևադարձային կլիմայական գոտում, այդ իսկ պատճառով հուլիս-օգոստոս ամիսներին արևադարձներից, հատկապես՝ Արաբական անապատային շրջաններից հանրապետության տարածք են ներթափանցում տաք օդային զանգվածներ, որոնք առաջ են բերում նման բարձր ջերմաստիճաններ:
Այդ մասին «Առաջին լրատվականի» հետ զրույցում մեզ տեղեկացրեց ՀՀ արտակարգ իրավիճակների նախարարության «Հայպետհիդրոմետի» օդերևութաբանական կանխատեսումների բաժնի պետ Գագիկ Սուրենյանցը:
«Այսօր օդի ջերմաստիճանը 40 աստիճան է: Վաղը արդեն օդի ջերմաստիճանի անկում է դիտվելու 1-2 աստիճանով, իսկ արդեն օգոստոսի 5-ին Սև ծովի ավազանից հանրապետության օդային տարածքներ կներթափանցեն արկտիկական ցուրտ օդային զանգվածներ, որոնցով պայմանավորված՝ ջերմաստիճանը 4-6 աստիճանով կնվազի, ևս 2 աստիճանով կնվազի օգոստոսի 6-ին»,- ասաց Գ.Սուրենյանը:
Նրա խոսքով՝ մայրաքաղաքում օգոստոսի 6-ին ունենանք 34 աստիճան տաքություն 40-ի փոխարեն»,- ընդգծեց նա՝ հավելելով, որ առաջին անգամ չէ, որ Երևանում դիտվում է 40 աստիճան տաքություն:
