16 ուժերի հանրահավաքը ավելի է խորացրել Լևոն Տեր-Պետրոսյանի մտավախությունը, որ քաղաքացիական պատերազմի վտանգ կա։ Ilur.am-ում հրապարակած հոդվածում առաջին նախագահը մեջբերել է վարչապետի թեկնածու հռչակված Մանուկյանի՝ Ազատության հրապարակում ելույթից, թե Փաշինյանը «թող հեռանա կամավոր, թե չէ կհեռանա զոռով», կամ որ «շարժումը չհաղթեց` գազազած ժողովուրդն իրեն կհոշոտի»:
«Հոշոտել և զոռով բառերը այլ բան, քան բռնություն չեն նշանակում»,- մեկնաբանում է Տեր-Պետրոսյանը` ընդգծելով. «Եթե սրանք միայն խոսքեր լինեին, ապա դեռ շատ մտահոգվելու կարիք չէր լինի: Բայց Մանուկյանի առաջնորդած բազմամարդ երթի կողմից վարչապետի կեցավայրի կեսժամյա շրջափակման և Փաշինյանի ընտանիքի ահաբեկման զազրելի արարքը ոչ այլ ինչ է, քան բռնության պատրաստակամության անթաքույց ցուցադրություն»։
Առաջին նախագահը միաժամանակ հայտարարում է, թե նույնպիսի դիրքորոշում է որդեգրել նաև Նիկոլ Փաշինյանը, որի պահվածքը և հռետորաբանությունը, ըստ Տեր-Պետրոսյանի, ցույց են տալիս, որ նա ամենևին մտադիր չէ կամավոր հեռանալ, այլ պատրաստ է ցանկացած առճակատման: «Հետևաբար, եթե երկու կողմն էլ վճռական են տրամադրված, ապա բախումն անխուսափելի է»,- եզրակացրել է Հայ ազգային կոնգրեսի առաջնորդ, առաջին նախագահ Լևոն Տեր-Պետրոսյանը՝ որպես ապացույց վկայաբերելով, որ թեև ոչ ինտելեկտուալ առումով, բայց իրենց խառնվածքով, համառությամբ, արկածախնդրական հակումներով և մինչև վերջ գնալու մոլուցքով Վազգեն Մանուկյանը և Նիկոլ Փաշինյանը երկվորյակներ են, երկուսն էլ խորհրդարանը գրոհելու «փայլուն» փորձ ունեն։
Քաղաքագետ Ռուբեն Մեհրաբյանը կիսում է առաջին նախագահ Լևոն Տեր-Պետրոսյանի մտահոգությունը և նշում.«Այո՛, քաղաքացիական պատերազմի վտանգը կա, իսկ թե դեպքերն ինչ զարգացում կստանան՝ կախված է նրանից, թե նախևառաջ այդ ընդդիմախոսների խումբը որքան սթափություն կդրսևորի այս զգուշացումներից հետո։ Եվ երկրորդը՝ տաք գլուխների հետ կապված, պետությունը որքան էֆեկտիվ կգործի այս վտանգը չեզոքացնլու ուղղությամբ»-«Առաջին լրատվական»-ի հետ զրույցում ասաց նա։
Մեհրաբյանն ընդգծեց.«Հայաստանը ժողովրդավարական պետություն է, կարելի է հանրահավաք ու երթ անել, կողմ ու դեմ լինել ցանկացած բանի, բայց ուլտիմատումով խոսակցությունը պետության հետ անընդունելի ու անթույլատրելի է, իսկ բռնության սպառնալիքները առավել ևս, դրանք պատժելի են քրեական օրենսգրքով։ Պետությունը պարտավոր է դա ապահովել,եթե լինի դրա անհրաժեշտությունը։Այս իմաստով Տեր-Պետրոսյանի նախազգուշացումը տեղին ու հասցեական է»,-եզրափակեց քաղաքագետը։
ԳԽ պատգամավոր Ազատ Արշակյանի խոսքերով՝ քաղաքացիական պատերազմի վտանգ միշտ հնարավոր է, որովհետև թե՛ ներսում կան անհանդուրժող, «աճեցված» ուժեր՝ եղբայրասպանության համար, և կարևորը՝ նաև դրսում կան շահագրգռված ուժեր, որ Հայաստանում քաոս լինի ու հայկական պետությունը կործանվի. «Դրսում կան ազդեցիկ ուժեր, որոնք ջանք ու ռեսուրս չեն խնայում Հայաստանը կործանելու համար։ Իսկ Հայաստանում կան քաղաքական լյումպեննեչ, որոնք պատրաստ են իրենց լյուպենական շահերի համար կործանել մեր երկիրը»,-«Առաջին լրատվակական»-ի հետ զրույցում ասաց նա։
Մեր զրուցակիցը նաև հույս հայտնեց, որ ողջախոհությունը և ամենակարևորը՝ արտաքին թշնամու դեմ կռված ուժերը կկանխեն ներքին խառնակությունները.«Իմ հույսը նրանք են։ Մենք այսօր ունենք մեծ քանակաությամբ իսկական թշնամուն թիրախավորած հզոր զանգված, մեր զորացրված զինվորականները, պատերազմից վերադարձածները։ Նրանք դա կկանխեն»,-եզրափակեց Արշակյանը։
Լուսանկարը՝ Armeniasputnik-ի
