New York Times պարբերականը կազմել է 21-րդ դարի 25 լավագույն դերասանների ցուցակը:
Պարբերականի կինոքննադատներ Մանոլա Դարգիսը և Էնթոնի Սքոթը շեշտել են, որ ներկայացված թոփ-25-ը սուբյեկտիվ է և սկանդալային՝ «որոշ բացթողումների պատճառով»:
Վարկանիշի առաջին հորիզոնականում ամերիկացի դերասան Դենզել Վաշինգտոնն է, որին լրագրողներն անվանում էին «էկրանի տիտան»:
«Նա կարող է մարմնավորել Շեքսպիր և Օգոստոս Ուիլսոն, չարագործների և հերոսների: Նա նաև փայլուն է խաղում սովորական մարդկանց դերերը»,- գրում է NYT-ը:
Երկրորդ տեղում ֆրանսիուհի Իզաբել Յուպերն է, որը նկարահանվել է «Նա» և «Դաշնակահարուհին» ֆիլմերում, իսկ երրորդ տեղում «տղամարդու լավագույն դերի» համար «Օսկար»-ի եռակի դափնեկիր բրիտանա-իռլանդացի դերասան Դանիել Դեյ-Լյուիսն է: Լավագույն հնգյակը եզրափակում են դերասան Քիանու Ռիվզը և դերասանուհի Նիկոլ Քիդմանը. կինոքննադատները նշել են դերասանուհու «աշխատասիրությունը»:
Ցուցակում ընդգրկված են նաև կորեացի դերասաններ Քիմ Մին-հին («Սպասուհին») և Սոն Կան-հոն («Պարազիտներ»): Լրագրողներն իրենց վարկանիշում ներառել են նաև իտալացի Թոնի Սերվիլոյին («Մեծագույն գեղեցկություն»), «Այրիներ»-ի աստղ Վիոլա Դևիսին, դերասանուհի Սիրշա Ռոնանին («Փոքրիկ կանայք», «Լեդի Բերդ») և «Ջոկեր» ֆիլմի գլխավոր դերակատար Խոակին Ֆենիքսին, որը զբաղեցնում է 12-րդ հորիզոնականը:
Վարկանիշի վերջին տեղերում են հայտնվել Սոնիա Բրագան, Մահերշալա Ալին և Գաել Գարսիա Բեռնալը:
