Ադրբեջանական1news.az-ի փոխանցմամբ՝ այսօր ԱՄՆ Սենատի արտաքին հարաբերությունների հանձնաժողովում լսումներ են տեղի ունենալու Կովկասի ու Թուրքիայի վերաբերյալ։ Քննարկվելու է Թուրքիայում ԱՄՆ դեսպանի պաշտոնում Ֆրենսիս Ռիկիարդոնեի հաստատման հարցը։
Դրա համար շատ կարևոր է Ռիկիարդոնեի անձանական մոտեցումն այնպիսի խնդիրների շուրջ, ինչպիսիք են Հայոց ցեղասպանությունը, Թուրքիայում դավանաբական ազատությունները և Վաշինգթոն-Անկարա հարաբերությունները։
Օգոստոսի 3-ին Սենատը պետք է դիտարկեր հաջորդ տարի ամերիկյան արտաքին օգնության վերանայման հարցը, սակայն դա հետաձգվել է անորոշ ժամկետով։ Ավելի վաղ նշվում էր, թե 2012 թվականին Հայաստանը ստանալու է 40 միլիոն դոլարի օգնություն, իսկ Լեռնային Ղարաբաղն ընդհանրապես օգնություն չի ստանալու։ Սա առաջացրել էր ամերիկահայ համայնքի խոր դժգոհությունը։
Ամերիկայի Հայ դատի հանձնախումբը (ANCA) դիմել է հայ համայնքին՝ կոչ անելով զանգվածային ձևով դիմել ամերիկացի սենատորներին՝ Հայաստանին հատկացվելիք օգնության ծավալ 60 միլիոն դոլար հասցնելու և Լեռնային Ղարաբաղին սովորաբար հատկացվող գումարի մակարդակը (10 միլիոն դոլար) նույնը թողնելու համար։
Հիշեցնենք, որ 2010 թվականի դեկտեմբերի 30-ին ԱՄՆ նախագահ Բարաք Օբաման, օգտվելով իր սահմանադրական իրավունքից և նրանից, որ Կոնգրեսը գտնվում է արձակուրդում, Ֆրենսիս Ռիկիարդոնեին նշանակեց Թուրքիայում ԱՄՆ դեսպանի պաշտոնում, որը ամիսներ շարունակ թափուր էր մնացել: Դրանից առաջ Ֆրենկ Ռիկիարդոնեն չէր կարողացել ստանալ Սենատի հավանությունը՝ այդ պաշտոնում նշանակվելու համար, քանի որ նրա թեկնածությունն արգելափակել էր ակնառու հանրապետական սենատոր Սեմ Բրաունբաքը:
