Թբիլիսիում, խորհրդարանի շենքի մոտ, մի քանի հազար մարդ, այդ թվում՝ ընդդիմադիր կուսակցությունների և քաղհասարակության ներկայացուցիչներ, հավաքվել են հոկտեմբերի 31-ին կայացած խորհրդարանական ընտրությունների արդյունքների դեմ բողոքի նպատակով: Բողոքի ակցիան ուղիղ հեռարձակել է TV Pirveli հեռուստաալիքը:
«Այսօր մենք այստեղ կանգնած ենք ոչ թե հանուն մանդատների, պատգամավորական բազկաթոռների կամ որևէ կոնկրետ մարդկանց խմբի: Մենք այստեղ ենք հանուն ազատ ընտրությունների, ընտրությունների, որը որոշել են խլել մեզանից, ինչին մենք բոլորս ասում ենք. «Ո՛չ»,- ասել է «Եվրոպական Վրաստան – շարժում հանուն ազատության» ընդդիմադիր կուսակցության առաջնորդներից Ելենա Խոշտարիան:
Ցույցը սկսվել է տեղական ժամանակով ժամը 15:00-ին: Մինչ այդ ընդդիմադիր կուսակցություններն իրենց համախոհների հետ Թբիլիսիի տարբեր կետերից երթ են կազմակերպել դեպի խորհրդարանի շենք: Ակցիային մասնակցում են նաև մարզերի բնակիչներ: Ցուցարարների մեծ թվի պատճառով քաղաքային իշխանությունները ստիպված են եղել արգելափակել Ռուսթավելի պողոտան, որտեղ գտնվում է խորհրդարանի շենքը: Սպասվում է, որ ցուցարարներին տեսաուղերձով կդիմի Վրաստանի նախկին նախագահ Միխայիլ Սահակաշվիլին: Խորհրդարանի շենքի մոտ ուժեղացվել է ոստիկանության հսկողությունը:
Բողոքի ակցիա է տեղի ունենում նաև Բաթումիում՝ դրամատիկական թատրոնի մոտ: