Ղրղզստանի նախագահ Սուրոնբայ Ժեենբեկովը Կուբաթբեկ Բորոնովին ազատել է վարչապետի պաշտոնից, հայտնում է ՌԻԱ-Նովոստին՝ հղում անելով պետության ղեկավարի մամուլի ծառայությանը:
Նշվում է, որ պաշտոնանկության հիմք է հանդիսացել Բորոնովի դիմումը:
Բացի դրանից, պետության ղեկավարը հրամանագիր է ստորագրել Օրոզբեկ Օպումբաևին Ազգային անվտանգության պետական կոմիտեի նախագահի պաշտոնից ազատելու մասին:
Հոկտեմբերի 5-ին Ղրղզստանում սկսվեցին զանգվածային բողոքի ակցիաներ: Ցուցարարները համաձայն չէին հոկտեմբերի 4-ին տեղի ունեցած խորհրդարանական ընտրությունների արդյունքների հետ: Ընդդիմության կուսակցությունների ղեկավարները ստեղծել են երկրի կառավարման համակարգող խորհուրդ և վարչապետ են նշանակել բանտից ազատված Սադիր Ժափարովին: Մի շարք ընդդիմադիրներ համաձայն չէին այս նշանակման հետ և ստեղծել են իրենց համակարգող խորհուրդը՝ վարչապետի պաշտոնում առաջադրելով Օմուրբեկ Բաբանովին:
