Թուրքական Haberpan կայքի փոխանցմամբ՝ Թուրքիայում վերացվելու է Ղուրանի դասընթացների հաճախման վրա դրված արգելքը, որը տարածվում է մինչև 12 տարեկան երեխաների վրա։ Այս մասին հայտարարել է արտասահմանաբնակ թուրքերի ու կրոնական գործերով թուրք փոխվարչապետ Բեքիր Բոզդաղը.
«Մեր երկրում ծնողները կարող են ազատորեն իրենց երեխաներին ուղարկել ցանկացած դասընթացների, նրանց սովորեցնել տալ արվեստի ցանկացած ճյուղ։
Սակայն եթե նրանք ցանկանում են, որ իրենց երեխան ծանոթանա իր կրոնի գրքի հետ, ապա նրանք խոչընդոտների կհանդիպեն։ Դա ամոթ է ժողովրդավարության և իրավունքի համար, դա մարդու իրավունքների խախտում է։ Մենք կանենք ամեն հնարավոր բան՝ Թուրքիան այդ ամոթից ձերբազատելու համար։ Այդ արգելքը վերացվելու է, խնդիրն էլ լուծվելու է կարճատև ժամանակահատվածում»։
Հիշեցնենք, որ մայիսի կեսերին էլ Ղուրանի դասընթացներին մասնակցելու համար մինչև 5-րդ դասարանի երեխաների վրա դրված արգելքի վերացման անհրաժեշտության մասին բարձրաձայնել էր Թուրքիայի կրոնական գործերի նախարար Մեհմեդ Գյորմեզն՝ ընդգծելով, որ դա հակասում է Սահմանադրության 24-րդ հոդվածին, որով փոքր երեխաներին հնարավորություն է ընձեռվում ստանալ ամեն տիպի կրոնական կրթություն։
