Թուրքիան այս անգամ անվերապահ աջակցություն է ցուցաբերում իր դաշնակից Ադրբեջանին՝ հռետորաբանությունից անցնելով բացահայտ գործողությունների, գրում է Bloomberg ամերիկյան գործակալությունը։
Հոդվածագիրն անդրադառնում է Հայաստանի և Թուրքիայի լարված հարաբերություններին՝ պատճառաբանելով դրանք Թուրքիայի Ցեղասպանության ժխտողական քաղաքականությամբ, միաժամանակ նշելով, որ Ադրբեջանը Թուրքիային բնական գազ և նավթ է մատակարարում արցախա-ադրբեջանական սահմանից 15 կմ և հակամարտության գոտուց 50 մղոն հեռավորության վրա գտնվող խողովակաշարերով»։
«Էրդողանը ուժ է կիրառում նախկին Օսմանյան տարածքի մեծ մասում վերահաստատվելու համար, այդ թվում՝ Ռուսաստանի դեմ Սիրիայում և Լիբիայում, իսկ Կիպրոսի, Հունաստանի և Իսրայելի դեմ Միջերկրական ծովում», գրում է հոդվածագիրը։
Անդրադառնալով հակամարտող կողմերի նկատմամբ ազդեցության լծակներ ունեցող երկրներին, հոդվածագիրը նշում է, որ Ռուսաստանը լծակներ ունի երկու կողմերի նկատմամբ էլ։ ԱՄՆ-ն նույնպես ունի զգալի ազդեցության լծակներ, սակայն վերջին տարիներին, ըստ հոդվածագրի, ԱՄՆ-ի հետաքրքրությունը տարածաշրջանի նկատմամբ նվազել է։
Հոդվածագիրը նաև անդրադարձել է Արցախում ռազմական գործողությունների հետևանքով Ադրբեջանին սպառնացող էներգետիկ վտանգին: «Էներգետիկ շուկաները Բաքու-Թբիլիսի-Ջեյհան նավթատարի վրա հնարավոր հարձակման վերաբերյալ մտավախություններ ունեն՝ ռազմական գործողությունների աճի ֆոնին», նշվում է հոդվածում:
