Ռուսաստանի Կրասնոդար քաղաքում բնակվող մեր հայրենակիցները՝ լսելով Ադրբեջանի կողմից սանձազերծած հարձակման մասին, ցանկություն են հայտնել վերադառնալ Հայաստան և պաշտպանել հայրենիքը:
Մասնավորապես, Կրանոդարում բնակվող հայերից մեկը՝ Սմբատ անունով, «Առաջին լրատվական»-ի հետ զրույցում նշեց, որ հայերով հավաքվել են ու ցանկություն ունեն գալ ու մասնակցել պատերազմին. «Միայն ցանկություն չէ, գալիս ենք: Մոտակա թռիչքով գալիս ենք, բայց ցավոք մոտակա թռիչքը ամսի 30-ին է: Առաջին խումբը 50-55 հոգի ենք, որ գալիս ենք, բայց ցանկացողները շատ շատ են»,-ասաց նա:
Սմբատի խոսքով, ամեն օր թռիչք չկա, շաբաթական մեկ օր է. «Գալիս ենք պատերազմին մասնակցենք, վերադառնանք: Կարող է մի քիչ էլ սպասենք արդեն ուշ լինի: Դրա համար պետք է ժամանակին հասնենք: Չգիտենք, թե պատերազմը ինչքան կձգվի, լայնամասշտաբ կլինի, թե փոքրամասշտաբ: Հայրենիքը մեր կարիքն ունի, մենք պետք է այդտեղ լինենք»,-ընդգծեց նա:
