Արցախի ուղղությամբ Ադրբեջանի կողմից սանձազերծված գործողություններին զուգահեռ Ադրբեջանը արգելում է իր բնակիչներին օգտվել գրեթե բոլոր սոցիալական ցանցերից: Տեղեկատվական անվտանգության փորձագետ Սամվել Մարտիրոսյանը հայտնեց, որ արգելափակումների մասին Ադրբեջանում սկսել են խոսել ռազմական գործողությունների մեկնարկից րոպեներ անց, իսկ երկրի համապատասխան գերատեսչությունն արդեն պաշտոնապես հայտարարել է սահմանափակումների մասին տեղեկությունը:
«Երբ հարձակումը սկսվեց, մոտ կես ժամ դրանից հետո սկսեցին գրել ադրբեջանցիները Թվիթերում, որ սահմանափակումներ են նկատում, չեն կարողանում մուտք գործել այլ ինտերնետ հարթակներ: Մի քանի րոպե առաջ արդեն Ադրբեջանի Տրանսպորտի և կապի նախարարությունը պաշտոնապես է հայտարարել, որ կապը սահամանփակում են Ադրբեջանում: Երևի տեսան, որ մեծ աղմուկ կարող է բարձրանալ և արդեն պաշտոնապես են հայտարարեցին»,- ասաց Մարտիրոսյանը:
Սամվել Մարտիրոսյանը նշեց, որ այժմ Ադրբեջանում գործում է միայն Թվիթերը, քանի որ օգտագործվում է դեպի դուրս քարոզչություն տարածելու համար։
«Այստեղ երկու վարկած կա` հնարավոր է, որ միանգամից արգելափակումներ մտցնելը նախօրոք պլանավորված է եղել, սակայն ուշագրավ է, որ նախկինում նման նախադեպ չի եղել, որովհետև միշտ կարողացել են մամուլն ու սոցիալական ցանցերը վերահսկել: Երկրորդ վարկածն այն է, որ տեսել են, որ կորուստները շատ են և փորձել են կասեցնել դրանց մասին տեղեկատվության տարածումը»,- նշեց նա:
Սամվել Մարտիրոսյանը հավելեց, որ այս պահի դրությամբ հայկական կայքերի վրա ադրբեջանական հարձակումներ չեն նկատվում:
