Լուրեր
Ողջ խնդիրն այն է, որ հեղափոխական ուժն իրականում պատրաստ չէր հեղափոխության
  • 21:30
  • 2020-09-26
  • Դիտումներ՝ *

Մեր նորանկախ պետությունը համասեռ զարգացում չունեցավ, հերոսական շրջանին հաջորդեցին ցնցումներ, աղավաղումներ, խեղաթյուրումներ, որոնք շարունակվում են միչև այսօր: Պահպանելով արտաքին ձևը՝ անկախությունը բովանդակության առումով տուժեց այս տարիների ընթացքում: Այս մասին «Առաջին լրատվական»-ի հետ զրույցում ասաց հրապարակախոս Սևակ Արամազդին:

«Մեր անկախության հիմքերը դրվել են ուղիղ և ճշգրիտ՝ շնորհիվ անկախությունը կերտած սերնդի և քաղաքական առաջնորդների: Եվ դրա շնորհիվ է, որ հետագա բոլոր ցնցումները չկարողացան սասանել մեր անկախությունը: Շեղում տեղի ունեցավ այն պատճառով, որ պատերազմից հետո, երբ թվում էր, թե հայ ժողովուրդը վերընթաց զարգացում պետք է ապրի, ընթացքը խզվեց՝ ենթակայական և աշխարհաքաղաքական գործոններով պայմանավորված, և հետևանքը եղավ Հայաստանում հաստատված ավազակապետությունը, որը ինչքան էլ փորձեց կոխկրտել անկախությունը և խեղդել հայ ժողովրդի ազատությունը, ի վերջո չհաջողեց, որովհետև հիմնված էր կեղծիքի վրա, ստորագույն բնազդների վրա, իսկ պատմությունն այդպիսիներին միշտ նետում է աղբանոցը, և նրանք չեն կարող կասեցնել անկախության ընթացքը»,- նշեց հրապարակախոսը:

Սևակ Արամազդիի խոսքով՝ երկու տարի առաջ տեղի ունեցած հեղափոխությունը հույսեր արթնացրեց, որ ի վերջո անկախությունը կշտկի իր մեջքը. «Եվ հայ ժողովուրդը կկարողանա պետական գիտակցության կամ պետականության ավանդույթ գոյացնել, սակայն այդ մասին չենք կարող հիմա պնդել… Ժողովուրդը կատարեց հեղափոխություն, և իշխանափոխություն կատարեց քաղաքական մի ուժ, որը գլխավերեց այդ հեղափոխությունը: Ամբողջ խնդիրն այն է, որ հեղափոխական ուժը պատրաստ չէր հեղափոխությանը…»:

Մանրամասները՝ տեսանյութում:

  • Դիտումներ՝ *