Յոթի խմբի (G7) (Մեծ Բրիտանիա, Գերմանիա, Իտալիա, Կանադա, ԱՄՆ, Ֆրանսիա և Ճապոնիա) ֆինանսների նախարարները, հավանաբար, սեպտեմբերի 25-ին հանդես կգան նոր կորոնավիրուսի համավարակի պայմաններում աղքատ երկրների համար պարտքի բեռի թեթևացման ծրագրի երկարաձգման նախաձեռնության պաշտպանությամբ: Այդ մասին հաղորդել է Reuters գործակալությունը՝ վկայակոչելով երեք իրազեկ աղբյուրներ։
Գործակալության տվյալներով՝ «Մեծ յոթնյակի» երկրների խորհրդաժողովը պետք Է տեղի ունենա սեպտեմբերի 25-ին հեռավար ձևաչափով, նախարարները կքննարկեն գլոբալ տնտեսական իրադարձությունները կորոնավիրուսի շարունակվող ներգործության ֆոնին: Աղբյուրները նշում են, որ քննարկման ընթացքում պլանավորվում է բարձրացնել աղքատ երկրների պարտքի տնտեսապես ընդունելի լինելու հարցը, որոնց պարտքի մակարդակը բարձր Էր նաև մինչև համավարակն սկսվելը: Ապրիլին G20-ն աղքատ երկրներին իրավունք է տվել արտաքին սուվերեն պատքի վճարումները, ներառյալ դրա սպասարկումը, դադարեցնելու մինչև ընթացիկ տարվա վերջը: Այդ կերպ ազատված ավելի քան 20 միլիարդ դոլարը պետք Է հատկացվի համավարակի դեմ պայքարին: Կորոնավիրուսի վարակի հարուցած հիվանդության բռնկումն արձանագրվել Է 2019 թվականի վերջին Կենտրոնական Չինաստանում և տարածվել երկրների մեծ մասում:
Մարտի 11-ին Առողջապահության համաշխարհային կազմակերպությունն այն ճանաչեց համավարակ: Բոլոր երկրներն ու տարածքները հարկադրված էին ձեռնարկելու սանիտարա-համաճարակաբանական բնույթի զանազան արտակարգ միջոցներ, ինչը հանգեցրել Է միջազգային խորը տնտեսական ճգնաժամի: Արժույթի միջազգային հիմնադրամի կանխատեսմամբ՝ ընթացիկ տարում համաշխարհային տնտեսությունում կարձանագրվի անկում գրեթե 5 տոկոսի չափով, բայց այն կվերականգնվի և հաջորդ տարի կաճի 5,4 տոկոսով։