Արդեն երկրորդ օրն է Սահմանադրական դատարանը փորձում է ՍԴ նախագահ ընտրել, սակայն դեռևս ընտրությունը չի կայացել. Ընտրությունը կկայանա վաղը: Ի՞նչն է բարդացնում ՍԴ նախագահի ընտրությունը: Թեմայի շուրջ «Առաջին լրատվական»-ը զրուցել է «Իրավունքի Եվրոպա» ՀԿ նախագահ, փաստաբան Լուսինե Հակոբյանի և փաստաբան Տիգրան Եգորյանի հետ:
Լուսինե Հակոբյանի դիտարկմամբ՝ կա բարդություն, որը պայմանավորված է առաջին հերթին հիմնական հավակնություն ունեցող թեկնածուի՝ Երվանդ Խունդկարյանի հետ: «Ի սկզբանե ակնհայտ էր, որ նա ՍԴ է գնում ՍԴ նախագահ ընտրվելու հավակնություններով: Ինտրիգը Խունդկարյանի շուրջ է պտտվում, տեղեկություններ կան, որ նա քչին չի համաձայնվել, և ի սկզբանե նրան խոստացվել է այդ պաշտոնը: Եվ հիմա այդ սցենարի զարգացմանն ենք ականատես լինում»,- ասաց Լուսինե Հակոբյանը:
Տիգրան Եգորյանը նշեց, որ ՍԴ դատավորներից մեկի խոսքով՝ հնարավոր է իշխանության հետ կան պայմանավորվածություններ Խունդկարյանի՝ ՍԴ նախագահ ընտրվելու հարցում: «Այդպիսի հնարավորություն թույլատրելն արդեն իսկ լուրջ մտահոգություն պետք է լինի իրեն ՍԴ դատավորի առաքելությանը և ստանդարտներին համապատասխան համարող ցանկացած դատավորի համար»,- նշեց Տիգրան Եգորյանը՝ հավելելով, որ անգամ նման խոստում տալը լուրջ հարված է Սահմանադրության սկզբունքներին:
Մեր զրուցակիցների դիտարկմամբ՝ ՍԴ նախագահը կարևոր ֆիգուր է, և Երվանդ Խունդկարյանի ընտրվելը կնշանակի ժողովրդավարական ուղու նահանջ: Կռիվ է ընթանում անցյալի և ժողովրդավարության միջև. կա՛մ հաղթանակ է տանելու ժողովրդի իշխանությունը, կա՛մ պատսպարված նախկինները:
«Գործ ունենք պարադոքսի հետ. ժողովրդի բացարձակ վստահությունը վայելող իշխանության ներսում ժողովրդավարական մղումները որոշակի պարտություններ են կրում. սա կազուս է»,- ընդգծեց Տիգրան Եգորյանը:
Մանրամասն՝ տեսանյութում: