Այսօր ԱԺ-ն գաղտնի քվեարկությամբ ընտրեց ՍԴ նոր դատավորներին՝ այն երեք թեկնածուին, որոնք առաջադրված էին, և որոնց անվան շուրջ բանավեճ էր ընթանում: Քվեարկությանը մասնակցում էին միայն «Իմ քայլ»-ը խմբակցության պատգամավորները, «Լուսավոր Հայաստան» և ԲՀԿ խմբակցությունները դեռ երեկ հայտարարել էին քվեարկությանը չմասնակցելու մասին:
Թեմայի շուրջ «Առաջին լրատվական»-ի հետ քննարկմանը մասնակցում էին վերլուծաբան Հակոբ Բադալյանը, «Անտարես» հրատարակչության տնօրեն Արմեն Մարտիրոսյանը և քաղաքագետ, «Հանուն հանրապետության» նախաձեռնության անդամ Ռուբեն Մեհրաբյանը:
Հակոբ Բադալյանի դիտարկմամբ՝ ՍԴ դատավորների ընտրությունը մասնագիտական տիրույթում չէր, և այն ավարտվեց քաղաքական հանգուցալուծմամբ: «ՍԴ-ում կան տարբեր ուղղություններից, տարբեր վեկտորներից դատավորներ, ինչը հակասական գնահատականներ և քննադատություն է առաջ բերում: Կարծում եմ՝ այս հարցում Նիկոլ Փաշինյանը առաջնորդվել է ընդհանուր քաղաքական, խորքային նվազագույն կայունություն ենթադրող կոնսենսուսի գալու սկզբունքով՝ հաշվի առնելով արտաքին զարգացումները, որ տեղի են ունենում եվրասիական գոտում»,- նշեց վերլուծաբանը:
Արմեն Մարտիրոսյանի խոսքով՝ դատավորը պետք է լինի անկախ: «Ես չեմ ուզում, որ մեր դատավորների վրա ազդեցություն ունենան այլ պետություններ, այլ ուժեր: Ես ուզում էի, որ նոր, մաքուր մարդիկ գային այս ասպարեզ: Արդեն գնացքը գնացել է, և ունենք ՍԴ: Ինչ կարելի է անել, որ 7 տարի հետո այս նույն վիճակը չլինի. այսօր պետք է գնալ ու փակել ԵՊՀ իրավաբանական ֆակուլտետը, որովհետև այդ «կզարանը», տարիներ շարունակ խողովակի, ձագարի միջով անցկացրել է դատավորներին, միայն հատուկենտ մարդիկ են պահպանել իրենց եսը, անկաշկանդությունը, գիտելիքատենչ ոգին սկզբունքայնությունը, մյուսներին «արդուկում» են այդ ֆակուլտետում, և այսօր ունենք խայտառակ իրավական դաշտ: Ես չեմ ուզում, որ այդ «արդուկվածները» որոշում կայացնեն իմ պետության վաղվա օրվա և այլ հարցերի շուրջ, պետք է փոփոխությունն սկսել կրթությունից, իրավաբանական ֆակուլտետի դասախոսներին ազատել աշխատանքից, ընտրել նոր մարդկանց՝ անկաշկանդ, ազնիվ և հեղափոխության արժեքներին համապատասխան սկբունքներ ունեցող:
Ռուբեն Մեհրաբյանի խոսքով՝ ԱԺ-ում այսօր տեղի ունեցածը ցավալի էր և վրդովեցուցիչ: «ԱԺ-ում քաղաքական մեծամասնությունը միահամուռ կերպով կատարել է Նիկոլ Փաշինյանի որոշումը: Այլ հարց է, թե ինչ գործոններ են Փաշինյանին բերել այս որոշմանը,- նշեց քաղաքագետը:
«Փաստորեն հակակոռուպցիոն հանձնաժողովը բացասական եզրակացություն էր տվել ՍԴ թեկնածուներից մեկի վերաբերյալ, և այդ եզրակացությունն արհամարհվեց»,- արձանագրեց Ռուբեն Մեհրաբյանը:
Մանրամասն՝ տեսանյութում: