Ինչ իրադարձություններ են տեղի ունենում Հայաստանում և Հայաստանից դուրս, այդ գործընթացներում ինչ ռիսկեր և վտանգներ կան Հայաստանի համար: Այս և այլ հարցերի շուրջ «Առաջին լրատվական»-ի հետ քննարկմանը մասնակցեցին վերլուծաբան Գոռ Մադոյանը, քաղաքագետ Էդգար Վարդանյանը և քաղաքագետ, «Հանուն հանրապետության» նախաձեռնության անդամ Ռուբեն Մեհրաբյանը:
Անդրադառնալով Լուկաշենկոյի շանտաժային հայտարարությանը, որ եթե Բելառուսը փլուզվի, հաջորդը Ռուսաստանն է լինելու, Էդգար Վարդանյանը նշեց, որ Լուկաշենկոն հիմքեր ունի այդպես ասելու, քանի որ շատ լավ գիտի, թե ինչպիսի ռեժիմ է ստեղծել ինքը Բելառուսում և շատ լավ հասնակում է, թե ինչ ռեժիմ է Ռուսաստանում, զուգահեռներ է անցկացնում, գիտի, որ այդ ռեժիմները շատ նման են մեկը մյուսին: «Ռուսաստանի հասարակության համար ոգեշնչման աղբյուր կարող են լինել Բելառուսում տեղի ունեցող գործընթացները: Եթե Բելառուսում տեղի ունենա թավշյա հեղափոխություն, մեծ է հավանականությունը, որ որոշ ժամանակ անց նմանատիպ հեղափոխություն տեղի կունենա նաև Ռուսաստանում: Այդ երկրներում քաղաքական մշակույթը գրեթե նույնն է: Առանց այդ էլ Հայաստանի օրինակը լուրջ ազդակ էր հետխորհրդային տարածքի ավտորիտար երկրների համար»,- նշեց քաղաքագետը:
Լուկաշենկոն հայտարարել է նաև, որ Մինսկը պատրաստ է պատերազմել հանուն Ռուսաստանի: Ինչ վտանգավորություն է պարունակում այս հայտարարությունը ԵԱՏՄ անդամ երկրների համար: «Եթե դիտարկենք վերջին հարյուրամյակների պատմությունը, այս հայտարարության մեջ նորություն չկա: Այլ հարց է, որ Բելառուսի ռեժիմը դադարել է երկխոսել քաղաքացիների հետ և դադարել է նրանց ընդունել որպես իշխանության կրող, երկիրն ավելի ու ավելի է խորանում Ռուսաստանից կախվածության ճահճի մեջ՝ բոլոր հնարավոր ձևերով ցույց տալով իր հպատակությունը Ռուսաստանին:
Ռուբեն Մեհրաբյանի դիտարկմամբ՝ Լուկաշենկոն իրեն նույնացնում է Բելառուսի հետ, հասկացնում է՝ Բելառուսը ինքն է: «Բայց Բելառուսը չի փլվի, իր նեխած իշխանությունն է փլվելու, այդ իշխանությունը չարիք է Բելառուսի համար դրսևորում է չարորակ հատկանիշներ և պատմականորեն դատապարտված է փլուզման, այլ հարց է, թե դա երբ տեղի կունենա: Լուկաշենկոն այլևս չի կառավարի Բելառուսը, իսկ ընդվզած ժողովուրդը դեռևս չի կարողանում վերցնել իշխանությունը: Բելառուսում կա իշխանության, առաջնորդության, լեգիտիմության լրջագույն ճգնաժամ: Բելառուսում աշխատաում է երկու բան՝ իշխանության մահակը և զանգվածային ընդվզումը. մահակը պատմական շանս չունի, պարտվելու է»,- ընդգծեց Ռ. Մեհրաբյանը:
Քննարկման մասնակիցների դիտարկմամբ՝ Հայաստանի կախվածությունը Ռուսաստանից բավականին նվազել է: Մեր զրուցակիցների կարծիքով՝ ՀՀ ներքաղաքական կյանքում լճացում է. տեղի ունեցողը «ղալմաղալ է», փոթորիկ է մի բաժակ ջրում:
Մանրամասն՝ տեսանյութում:
