Սեպտեմբերի 15-ից հանրակրթական դպրոցներում ու բուհերում կվերսկսվեն դասապրոցեսները։
Ի՞նչ վտանգներ ունի դպրոցների վերաբացումը, և արդյոք ճի՞շտ եք համարում այդ որոշումը․ «Առաջին լրատվական»-ի հարցին «Մուրացան» համալսարանական հիվանդանոցային համալիրի մանկաբուժական թիվ 2 կլինիկայի ղեկավար Մարի Դարակչյանը պատասխանեց․ «Կարծում եմ՝ բոլորս հասկանում ենք, որ երեխաները բոլոր վիրուսային վարակների ժամանակ եղել են այն խոցելի խումբը, որի դեպքում վիրուսի տարածումը թե՛ ներսում, թե՛ այլ խմբերի վարակի աղբյուր հանդիսանալը միշտ կարևոր է եղել։ Իհարկե, այսօր սա ռիսկային որոշում է։ Բայց մյուս կողմից պետք է հասկանալ, որ հավետ հնարավոր չէ փակված վիճակում ապրել, և հավետ չենք կարող մեր երիտասարդների ու երեխաների կրթությունը բաց թողնել։ Ես ինքս ծնող լինելով, նախորդ այդ ամիսների ընթացքում որոշակիորեն տեսել եմ հեռավար կրթության բացերն ու խնդիրները, որովհետև, բնականաբար, երեխաները կրթվում են ոչ միայն այն դասերից, որոնք նրանք լսում են, այլ նաև այն շփումներից, որոնք նրանք ունենում են իրենց հասակակիցների հետ։ Հետևապես, այստեղ պետք է հասկանալ այս երկու ռիսկերը։ Բացելուց երկու շաբաթ հետո պետք է վերագնահատել իրավիճակը, որովհետև այդ ժամանակ հասկանալի կլինի բացման ազդեցությունը համավարակի տեմպերի վրա, որից հետո, կարծում եմ՝ որոշումները կլինեն ըստ իրավիճակի»։
Դպրոցների բացումը ենթադրում է մեծաթիվ մարդկանց տեղաշարժ։ Ռիսկերն արդյո՞ք կառավարելի են․ «Առաջին լրատվական»-ի հարցին Մարի Դարակչյանը պատասխանեց․ «Ես չեմ կարող որևիցե վստահ բան ասել ռիսկերի կառավարելիության մասին։ Ժամանակը ցույց կտա, թե արդյոք հնարավոր է ռիսկերը կառավարել, կանխարգելել։ Ամեն դեպքում, ինչքան տեղյակ եմ՝ դասերին մասնակցությունը լինելու է դիմակով։ Այն ենթադրում է, որ դասատուների վրա ավելանում է ևս մեկ պարտավորություն՝ հետևել այդ կարգուկանոնին։ Իսկ բուհերում որոշ դասեր, որոնք կլինեն տեսական, նորից լինելու են հեռավար»։
Մանրամասները՝ տեսանյութում։
