Բելառուսի նախագահ Ալեքսանդր Լուկաշենկոն ասել է, որ չի կարող որևէ բանում մեղադրել ուժայիններին՝ Բելառուսում անցկացվող բողոքի ցույցերի ժամանակ նրանց իրականացրած գործողությունների համար, քանի որ նրանք իրենք են տուժող կողմ հանդիսանում, գրում է ԲԵԼՏԱ-ն:
«Ես այսօր որևէ մեկին չեմ կարող պահանջ ներկայացնել «…» Ի՞նչ է, հատուկջոկատայիններին էր դա պետք, թե՞ ոստիկանությանը: Այո, նրանք հանգիստ մարզվում էին, ապրում էին այդ զորանոցում: Բայց նրանք դուրս եկան պաշտպանելու նրանց (քաղաքացիներին)»,- ասել է Լուկաշենկոն:
Նա հավելել է, որ «բոլորն էլ հասկանում են», թե ում է ձեռնտու Բելառուսում անցկացվող բողոքի ցույցերը. երկրում իրավիճակն ապակայունացնում են Ռուսաստանից, Ուկրաինայից, Հոլանդիայից և Լեհաստանից եկած սադրիչները, իսկ ցուցարարները ճիշտ կանեն նստեն տանը և չխցկվեն այտեղ՝ «ուր որ պետք չէ»:
Բելառուսում նախագահական ընտրություններն անցկացվել են օգոստոսի 9-ին: Հանրապետությունում, ընտրատեղամասերի փակվելուց հետո, զանգվածային բողոքի ակցիաներ են սկսվել ընտրությունների արդյունքների կեղծման դեմ: Բողոքի ցույցերի ընթացքում ոստիկանությունը և ներքին զորքերը ցուցարարների դեմ արցունքաբեր գազ, լուսաձայնային նռնակներ և ռետինե փամփուշտներ են կիրառել:
Ավելի ուշ երկրի խոշորագույն արդյունաբերական ձեռնարկություններում գործադուլ է սկսվել, աշխատակիցները պահանջում են նոր ընտրությունների անցկացում և ցուցարարների նկատմամբ բռնությունների դադարեցում: Ընդդիմության բոլոր թեկնածուների շտաբները հայտարարել են, որ չեն ճանաչում ընտրությունների պաշտոնական արդյունքները:
Բելառուսի ՆԳՆ-ի տվյալներով, օգոստոսի 9-ից 13-ը հանրապետությունում ձերբակալվել է մոտ 7 հազար մարդ, այդ թվում՝ գրեթե 70 լրագրող: Նրանց մի մասն արդեն ազատ է արձակվել:
