Այսօր Ռուսաստանի և Թուրքիայի նախագահները հեռախոսազրույց են ունեցել, որտեղ քննարկել են հայ-ադրբեջանական սահմանային վերջին կոնֆլիկտը: Հայտնի է նաև, որ Պուտինը խորհուրդ է տվել չխառնվել հայ-ադրբեջանական կոնֆլիկտին: Թեմայի շուրջ «Առաջին լրատվական»-ի հետ զրույցում քաղաքագետ Ստեփան Գրիգորյանը նշեց, որ այս հարցում Ռուսաստանն իրեն դրսևորեց որպես Հայաստանի լուրջ դաշնակից. «Ռուսաստանը այդ քայլերն անում է հաշվի առնելով ՌԴ շահերը և դրանք այս դեպքում համընկնում են Հայաստանի շահերի հետ, և Ռուսաստանն իրեն ադեկվատ է պահում Հայաստանի նկատմամբ: Սա արդյունք է նաև Նիկոլ Փաշինյանի վարած քաղաքականության՝ լավ աշխատել, բարեկամական հարաբերություններ ունենալ, բայց պատվաբեր հարաբերություններ:
Ադրբեջանը ուզում է Թուրքիային ներքաշել գործընթացների մեջ, ակնհայտ է, որ Ռուսաստանը ուշադիր է այդ հարցում, և եթե իր հետ հաշվի չնստեն, ուղղակի հարվածներ կհասցնի: Ռուսաստանն ունի շահեր, եթե Նախիջևանի ուղղությամբ լուրջ հարվածեն, Ռուսաստանը կմիջամտի… Նախիջևանը Ռուսաստանը իր ազդեցության գոտի է համարում: Ե՛վ Լավրովը, և՛ Պուտինը Թուրքիային «տեղը դրեցին»՝ զգուշացնելով, որ եթե սխալ անեն, ոչ թե Հայաստանի, այլ Ռուսաստանի հետ գործ կունենան»:
Քաղաքագետի դիտարկմամբ՝ Ադրբեջանը և Թուրքիան Տավուշում ձախողվեցին, բայց հնարավոր է նոր փորձեր ձեռնարկեն:
Անդրադառնալով սահմանային լարվածության ֆոնին հայաստանյան որոշ ուժերի և ռուսաստանաբնակ հայազգի որոշ հայտնի գործիչների արձագանքին, Ստեփան Գրիգորյանն ընդգծեց. «Նախկինները գտնվում են դրսի հատուկ ծառայությունների ազդեցության տակ: Սահմանին իրավիճակը լարվեց, նախկիններից շատերը սկսեցին թիկունքից «դանակով խփել» Փաշինյանին, սա ազգի դավաճանություն է»:
Մանրամասն՝ տեսանյութում: