Տավուշի իրադարձությունները ևս մեկ անգամ վերահաստատեցին, որ հայկական Զինված ուժերը տարածաշրջանային անվտանգության համակարգի առանցքն են և որ լիովին ի վիճակի են պահպանել և պաշտպանել այդ դերը: Եվ այդ դերն ու նշանակությունը, այսօր՝ 21-րդ դարում, չի կարող հիմնված լինել լոկ Զինված ուժերի մարտունակության վրա. այսօր անվտանգության հոմանիշն են բարձր տեխնոլոգիաները, մարտավարությունը, արդիականությունը, մրցունակությունն ու մրցակցայնությունը… Ի՞նչ ապացուցեց տավուշյան սրացումը և ի՞նչ նոր իրողություններ ի հայտ բերեց Հայաստան-Թուրքիա-Ադրբեջան եռյակում:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության գործադիր մարմնի անդամ Արեգ Թադևոսյանը և սոցիոլոգ Արտակ Սաղաթելյանը:
Արեգ Թադևոսյանի խոսքով՝ տավուշյան սրացման ժամանակ դրսևորվեց մեր բանակի բարձր մարտունակությունը. «Բոլորս պետք է իրար շնորհավորենք, որ խայտառակ վիճակում չհայտնվեցինք, անգամ կարողացանք դիրքերն ուժեղացնել:
Կարևորելով բանակի զարգացումը և նոր տեխնոլոգիաներով համալրումը՝ Արեգ Թադևոսյանը նաև նկատեց. «Ադրբեջանի բարձր տեխնոլոգիական զենքերի հետ կապված զավեշտալի իրավիճակները ցույց են տալիս, որ եթե այդ տեխնոլոգիայի հետևում կանգնած չէ մեծ ինտելեկտ և բարձր մարտական ոգի ունեցող անձ, ապա դա էլ չի փրկի:
Պետք է լրջագույնս մտածել, զգոնությունը չկորցնել, որովհետև իրավիճակը կարող է փոխվել… Հնարավորինս պետք է խուսափենք զոհեր ունենալուց»:
Արտակ Սաղաթելյանի դիտարկմամբ՝ տավուշյան դեպքերը ցույց տվեցին, որ 2016թ. Ապրիլյան պատերազմից հետո դասեր քաղել ենք և մեր բանակը շատ ավելի պատրաստված է: «Ռազմարդյունաբերությունն ու տնտեսությունը բարձր մակարդակի վրա պահելը մեզ համար օրհասական խնդիր է»: Արտակ Սաղաթելյանը նաև ընդգծեց, որ ՀՀ-ն և ՌԴ-ն շարունակում են պաշտպանության ոլորտում համագործակցել. «Տեսնում ենք, որ ՀՕՊ համակարգերը Ռուսաստանի հետ համագործակցությամբ իրենց դերն ունեցան և դրական ազդեցություն թողեցին տավուշյան իրադարձությունների ելքի վրա»:
Քննարկման մասնակիցների դիտարկմամբ՝ Հայաստանը պետք է լինի ռազմական պետություն, անհրաժեշտ է զարգացնել ռազմարդյունաբերությունը և չպետք է վախենալ հակառակորդից:
Մանրամասն՝ տեսանյութում: