«Մենք հպարտ ենք մեր բանակի գործողություններով: Ցավակցում ենք մեր զոհված տղաների ընտանիքներին, որոնք իմաստուն կերպով գիտակցում էին, թե ինչի համար են պայքարում, և ցավոք, իրենց կյանքը տվեցին»,- «Առաջին լրատվական»-ի հետ զրույցում անդրադառնալով վերջին օրերին հայ-ադրբեջանական սահմանին ստեղծված լարվածությանը՝ նշեց ԱԺ «Իմ քայլը» խմբակցության պատգամավոր Հովհաննես Իգիթյանը:
«Ինչպես եկավ Ադրբեջանը այս իրավիճակին, այս ագրեսիային: Հետևում էինք Ալիևի անհեթեթ հարցազրույցներին ու հայտարարություններին, օրինակ՝ Ալիևը հայտարարեց, որ իր հոր՝ Հեյդար Ալիևի պաշտոնավարման ժամանակ հայերը ծնկաչոք էին ապրում Ղարաբաղում, և պետք է այնպես անեն, որ հայերը վերադառնան ծնկաչոք վիճակին: Այս անհեթեթ հայտարարությունից հետո Ալիևը պարծենում էր, որ Ադրբեջանը հարուստ երկիր է, ունի զենք և այդ զենքով կարող է վերադարձնել «պատմական» հողերը, և անհեթեթ հայտարարություններ էր անում, որ իբրև թե հայերն ապրում են Ադրբեջանի պատմական հողերի վրա, և որ Երևանը իբրև թե ադրբեջանական քաղաք է: Ալիևը նաև հայտարարում էր, որ դժգոհ է բանակցային իրավիճակից, և որ ինքը պատրաստ է ռազմական ճանապարհով խնդիրը լուծել: Այսինքն՝ Ալիևը և նրա շրջապատը ստեր էին հորինում և հավատում դրան, միջազգային տարբեր մակարդակներում ներկայացնում այդ սուտը, և այդ ամենն իրականացնում էին և՛ ադրբեջաներեն, և՛ ռուսերեն քարոզչությամբ: Այդ ամենը նրանց փակուղու առաջ է կանգնեցրել, և նրանք դարձել են իրենց ստի պատանդը»:
Հայ-ադրբեջանական պետական սահմանագոտում անցած գիշեր և այսօր հարաբերական անդորր է. օպերատիվ իրավիճակը շարունակում է մնալ հանգիստ: Արդյո՞ք Ադրբեջանը ձախողվեց, այդ պատճառով է լռում, թե՞ դրսի հորդորների արդյունք է սա, գուցե կան նաև այլ հանգամանքներ: Անդրադառնալով այս հարցին՝ պատգամավորը նշեց. «Դրսի ազդեցությունն, իհարկե, առկա է, բայց, օրինակ՝ Թուրքիան խրախուսում էր Ադրբեջանի ագրեսիան: Մեր դիվանագիտական կորպուսը բոլոր մակարդակներում աշխատում է, բայց մենք հասկանում ենք, որ միջազգային կազմակերպությունները իներցիոն են…, և այն, ինչ այսօր իրականացնում է մեր բանակը, հաճախ միակ ձևն է ադրբեջանական ագրեսիան լռեցնելու համար: Մեր բանակը բոլոր ուղղություններով պատրաստ է ցանկացած ագրեսիայի»:
Հովհաննես Իգիթյանը նաև ընդգծեց, որ հայկական կողմի հիմնական մեսիջը խաղաղությունն է:
Մանրամասն՝ տեսանյութում:
