Նախագահ Արմեն Սարգսյանը հերթական անգամ հայտնվել է սուր քննադատությունների թիրախում: Այս անգամ պատճառը ԱԺ կանոնակարգ օրենքի հայտնի փոփոխությունը ստորագրելն էր: Դրանով ԱԺ-ն ստանում էր ՍԴ կազմին վերաբերող սահմանադրական փոփոխությունն առանց նախագահի ստորագրության հրապարակելու իրավունք:
Քաղաքագետ Ռուբեն Մեհրաբյանի կարծիքով՝ նախագահ Արմեն Սարգսյանին ուղղված քննադատությունները միանգամայն հասկանալի են: «Նրանց այդ հիվանդագին արձագանքները ու սևեռվածությունը նախագահի անձի վրա միանգամայն բացատրելի են: Իրենք համարում էին, որ եթե նախագահ Արմեն Սարգսյանը նախագահ է դարձել Սերժ Սարգսյանի օրոք, ապա Սերժ Սարգսյանի իրավական տանիքներին պետք է «տիրություն անի»՝ վարձահատույց լինելով Սերժ Սարգսյանին ինչ-ինչ արժանիքների համար»,-«Առաջին լրատվական»-ի հետ զրույցում ասաց նա:
Մեհրաբյանն արձանագրում է ՝ Արմեն Սարգսյանը պետության և հանրության շահերով, ՀՀ օրենքներով առաջնորդվող պետական գործիչ է ու այս էժանագին վայնասունը իհարկե կարհամարհի. «Իհարկե, Արմեն Սարգսյանն իրեն ամբողջությամբ արդարացնում է: Նա այսօր անփոխարինելի դեր է կատարում մեր պետության մեջ՝ որպես իրավիճակը կայունացնող, որպես ծանր քաշային քաղաքական գործիչ: Այս բարեփոխումների հարցում ևս նա հանդես է գալիս որպես ոգեշնչող անձնավորություն, նաև՝ որպես Հայաստանը հետկորոնավիրուսային աշխարհի ճանապարհին շատ կարևոր կողմնորոշիչ տվող գիտական անձնավորություն: Արմեն Սարգսյանն ունի միջազգային բարձր համբավ: Եվ այս բոլոր ցուցիչներով ես նրա գործունեությունը ավելի քան դրական եմ գնահատում: Եվ դա չափազանցություն չէ. անցած երկու տարին դա հստակ ապացուցեց»:
ԳԽ պատգամավոր Ազատ Արշակյանի կարծիքով՝ Սահմանադրությամբ նախագահի ինստիտուտը քաղաքական, նույնիսկ հասարակական գործառույթ չունի: «Այդ կարգի նախագահական ինստիտուտներ Եվրոպայում ձևավորվեցին այն երկրներում, որտեղ եղել է անսահմանափակ իշխանությամբ միապետ, օրինակ՝ Իտալիայում՝ Մուսոլինին, Գերմանիայում՝ Հիտլերը, Իսպանիայնում՝ Ֆրանկոն: Այնտեղ միապետի իշխանությունը դուրս մղվեց քաղաքական որոշումներ կայացնելու, հասարակական կյանքին ակտիվ մասնակցելու իրավունքից ու մնաց խիստ խորհրդանշական: Հայաստանում երբևէ չի եղել այդպես, օրինակ՝ բոլշևիկների առաջին քարտուղարը այդպիսի լիազորություններ չի ունեցել, մեր թագավորները միջնադարում անսահմանափակ իշխանություն չեն ունեցել, նախարարները հակակշիռ են եղել, ու հավասարակշռություն է եղել: Անիմաստ է հայ ժողովրդին պարտադրել իրավազուրկ մի պաշտոն, ճիշտ այնպես, ինչպես Հանրային խորհուրդը: Ոչ մի լուրջ գործառույթ չունի, ավելորդ և ընդօրինակված, գուցե և պարտադրված ինստիտուտներ են Հայաստանում»,- «Առաջին լրատվական»-ի հետ զրույցում ասաց նա:
Միևնույն ժամանակ Արշակյանն ընդգծեց՝ քանի որ Արմեն Սարգսյանը անձամբ հեղինակություն է՝ որպես հայ մտավորական, բնական է, որ Հայաստանի Հանրապետության զարգացման հակառակորդների կողմից նա կթիրախավորվի: «Այն ամենը, ինչ որ լավն է այսօր, դարձել է թիրախ: Արմեն Սարգսյանը հայ մտավորական է, որը նաև շատ խորհրդանշական պաշտոն ունի: Թեկուզ խորհրդանշական պաշտոնին, մտավորական, կառուցողական լինելը վտանգավոր է, դրա համար իրեն թիրախավորում են, վարկաբեկում, ներքաշում ինչ-որ ինտրիգի մեջ ու փորձում են թուլացնել կայունությունը Հայաստանի Հանրապետությունում. ապակայունացնելու խնդիր ունեն՝ թիրախը Արմեն Սարգսյանն է: Այն ամենը, ինչը լավն է, թիրախավորված է հակառակորդի կողմից՝ սկսած տարեց քաղաքացիների վիրուսների կողմից»,- կեսկատակ հավելեց մեր զրուցակիցը: