Ռուսական newsru.com կայքի փոխանցմամբ՝ այսօր Մոսկվայում ոգեկոչել են խորհրդային տարիներին բռնությունների ենթարկված անձանց հիշատակը, որին նախորդել է Բռնությունների զոհերի համայնքի կազմակերպած միտինգը։
Ռուս ուղղափառ եկեղեցու և հասարակության փոխհարաբերությունների բաժնի ղեկավար Վսեվոլոդ Չապլինը հայտարարել է, որ քաղաքական բռնությունների զոհ դարձած անձինք ու նրանց հարազատները, վետերանները, հասարակությունը, եկեղեցին պետք է ամեն ինչ անեն, որպեսզի ոչ ոք և ոչինչ չմոռացվի.
«Հասարակությունը չի կարող հանգիստ ապրել և «արժանի ապագա չի ունենա», եթե դասեր չքաղի պատմական սխալներից, եթե չդատապարտի այդ քաղաքական ու իրավական հանցագործությունները, եթե չվերականգնվի ժողովրդի թշնամի որակված մարդկանց բարի անունը։
Ռուսաստանն արժանի ապագա չի ունենա, եթե չտա հանցագործների անունները՝ Ստալին, Լենին, Տրոցկի, Ուրիցկի, Սվերդլով։ Սրանք կարմիր տեռորի, ստալինյան բռնությունների կազմակերպիչներն են։ Մեր հասարակությունը, պետությունը, ժողովուրդը պետք է ոչ միայն սա իմանան, այլև՝ ակնհայտորեն արտահայտվեն այս մասին»։