Թուրքական Radikal թերթի փոխանցմամբ՝ թուրքական ընդդիմության առաջնորդ, Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուն Ստամբուլի օդանավակայանում պատասխանել է լրագրողների հարցերին։
Անդրադառնալով Քրդստանի աշխատավորական կուսակցության (PKK) գործունեությանը, որի արդյունքում վերջին օրերին սպանվել է ավելի քան 15 թուրք զինծառայող՝ Քըլըչդարօղլուն հայտարարել է, որ այդ խնդիրը չի լուծվի զենքի ուժով.
«Ահաբեկչության խնդրի լուծման տեղն այստեղ է՝ խորհրդարանում։ Դա անհրաժեշտ է լուծել հենց այստեղ։ Անհրաժեշտ են քաղաքական նախաձեռնություններ։ Զենքի ուժով այս հարցը չի լուծվում։ Մենք պատրաստ ենք աջակցել խնդրի լուծմանը»։
Հիշեցնենք, որ թուրքական կառավարությունը վճռել է այսուհետ ահաբեկչության դեմ պայքարում ներգրավել նաև թուրքական ոստիկանությանը։