Փոխվարչապետ, պարետ Տիգրան Ավինյանի մամուլի խոսնակ Վահան Հունանյանը ֆեյսբուքյան իր էջում գրել է, որ կորոնավիրուսի դեմ պայքարում առանցքային կարևորություն ունի միջազգային համագործակցությունը. «Մեր պարագայում նմանօրինակ համագործակցությունն ուղղված է թե՛ փորձի փոխանակմանը, թե՛ պայքարի համար անհրաժեշտ միջոցների ձեռք բերման և Հայաստան տեղափոխման աշխատանքների համակարգմանը: Այս առումով հանրությունը մշտապես պատշաճ կարգով տեղեկացվել է ինչպես մեր գործընկերների հետ տարվող աշխատանքների, այնպես էլ միջազգային համագործակցության շրջանակներում Հայաստանի առողջապահական համակարգի համար պետության կողմից ձեռք բերված և գործընկերների կողմից Հայաստանին նվիրաբերած միջոցների մասին»։
Հունանյանը նաև նշել է, որ պարետատան կողմից դիտարկվում են տարբեր սցենարներ, այդ թվում՝ մեր միջազգային գործընկերներին աջակցության հարցով դիմելու հնարավորությունը, որի կարիքն այժմ գնահատվում է։
Քաղաքական մեկնաբան Հակոբ Բադալյանի կարծիքով՝ Հայաստանը կարող է ակնկալել արտաքին աջակցություն: «Իհարկե, պարզ չէ, թե որ երկիրն ինչ ծավալով օգնություն կցուցաբերի, բայց այս իրավիճակում երկրները միշտ պատրաստ են որոշակի աջակցություն ցուցաբերել դրա կարիքն ունեցող երկրներին։ Այստեղ պետք է շատ հստակ արձանագրել՝ մենք պետք է լինենք պետություն, որ մեր ուժերով կարողանանք կառավարել իրավիճակը, լուծել խնդիրները։ Բայց կարող են լինել նաև իրավիճակներ, երբ արտաքին աջակցության կարիքը լինի, նման երկրներ կգտնվեն։ Պետք է հասկանալ, թե կոնկրետ ինչ աջակցություն է ակնկալում մեր կառավարությունը»,- «Առաջին լրատվական»-ի հետ զրույցում ասաց նա։
Ինչ վերաբերում է ԵԱՏՄ-ին, դրա արդյունավետությանը ճգնաժամային իրավիճակներում, Հակոբ Բադալյանն ասաց. «Ընդհանրապես ԵԱՏՄ-ի կենսունակությունը ոչ միայն այսպիսի իմաստներով, այլև քաղաքական, ռազմաքաղաքական, ամենևին նոր չէ, որ պետք է բացահայտումներ անենք։
Հենց ամենասկզբից էլ պարզ էր, որ ԵԱՏՄ-ն չհաջողած պետությունների, ոչ արդյունավետ կառավարմամբ պետությունների միավորում է։ Դա այնքան պարզ էր ամենասկզբից, որ այս համավարակով չէ, որ պետք է բացահայտվեր դրա կենսունակությունը։ Իհարկե, խոսք է գնում, որ Ռուսաստանը որոշակի աջակցություն է ցուցաբերում Հայաստանին, որովհետև ռեսուրսային ավելի մեծ հնարավորություններ ունի, բայց ինքնին ԵԱՏՄ-ի հետ կապված երբեք պատրանքներ չեն էլ եղել, որ հիմա ինչ-որ բան բացահայտվի ու պարզ դառնա, որ այն չէր, ինչ մենք պատկերացնում էինք»։
Քաղաքագետ Լևոն Շիրինյանի կարծիքով՝ դիմելուց առաջ Հայաստանը պետք է իր ռեսուրսներն ի մի բերի: «Ամենակարևոր ռեսուրսը կառավարչական ապարատի անորակության ու ժողովրդի անկարգապահության մեջ է։ Պետական այս ապարատով, Սերժի օրենսդրությամբ Հայաստան չի ստեղծվի, այս ապարատի արդյունավետությունը պետք է բարձրացնել՝ անգործ ու հորանջողները պետք է հրաժեշտ տան։ Թող դա փորձեն միջազգային կառույցներին դիմելու փոխարեն, այլապես հայացքը օտարին 300 տարի ապրում ենք»,- «Առաջին լրատվական»-ի հետ զրույցում ասաց նա։
Ըստ մեր զրուցակցի՝ կառավարչական ապարատը ոտքից գլուխ պետք է փոխվի, նախարարների կարգապահությամբ պետք է առաջնորդվենք. «Սա ստուգատես է, չպետք է ոռնոց դնել, ինչպես որ անում են կորոնավիրուսի արհավիրքներից խուսափելու համար։ Ես ուշադիր նայում եմ այս կառավարության գործունեությանը, ժողովրդի պատրաստակամության մակարդակին, վերլուծաբանների հակապետական գործունեությանը, ամեն մեկը մի էլեկտրիկ, կենսաբան է, յուրաքանչյուրը քննում է իշխանության գործունեության որակը։ Ո՞րն է Վրաստանի հաջողության աղբյուրը՝ հաշվարկի մեթոդաբանությունը, որովհետև տուրիզմի երկիր է, երկրորդ՝ Վրաստանը կիրառում է բարձր տուգանքների ֆինանսական սիստեմ, ոստիկանությունը բազար չի անում, ով խախտեց՝ կտրոնը տալիս են ձեռքը, Վրաստանի գաղտնիքը հենց այստեղ է»։
Շիրինյանը հարցադրում է անում՝ այսպե՞ս եք ձեզ պատերազմի ժամանակ պահելու. «Մեր ժողովուրդը սովոր է կոտորվելուն։ Ասում են՝ ամեն մի ճգնաժամի ժամանակ հարյուրավոր մահեր ենք տվել։ ԽՍՀՄ կոչվածի համար 300 հազար զոհ ենք տվել, ամեն մի պատմաբան ուսանողների մոտ գլուխ է գովում, բայց ինչի՞ եք տվել, պետք է հոգեբանությունը փոխվի, նվազագույն զոհերով պետք է դուրս գանք։ Կառավարությունը պետք է իր ներսում արտակարգ դրություն հայտարարի՝ մինչև որ իրավիճակը կարգավորվի։ Ուրիշի փողերով հայրենիք կառավարելուն վերջ տվեք»։
