Թուրքիան հունիսի 4-ից ուղևորափոխադրումների համար վերաբացել է Իրանի հետ սահմանային Աղրը նահանգի Գյուրբուլաք և Նախիջևանի հետ սահմանային Իգդիր նահանգի Դիլուջու սահմանային անցակետերը։ Այս մասին հայտնել է Թուրքիայի առևտրի նախարար Ռուհսար Փեքջանը։
Որոշումը կայացվել է երկրում COVID-19-ի համավարակով պայմանավորված սահմանափակումների մեղմացման շրջանակում։
Թուրքիան Իրանում կորոնավիրուսի տարածման ֆոնին փետրվարի 23-ին փակել էր այդ երկրի հետ իր բոլոր անցակետերը, այդ թվում՝ Իգդիր նահանգի սահմանը։ Փակվել էր նաև Իգդիր նահանգի Արալըք շրջանում Թուրքիայի ու Նախիջևանի սահմանի Դիլուջու անցակետը։
Նոր կորոնավիրուսային համավարակով պայմանավորված սահմանափակումների հետևանքով անցակետերում բեռնատար մեքենաների շարասյուն էր գոյացել:
Ըստ թուրքական աղբյուրի, բեռնատարների վարորդները թուրքական սահմանային անցակետում պարտադիր ջերմաչափվելու են: Թուրքիայի տարածքում դիմակ կրելը նույնպես պարտադիր կլինի վարորդների համար: