Աթենքում, ԱՄՆ դեսպանատան մոտ, բախումներ են տեղի ունեցել ոստիկանության և ցուցարարների միջև՝ աֆրոամերիկացի Ջորջ Ֆլոյդի սպանության պատճառով, հայտնում է հունական ERT հեռուստատեսությունը:
Նշվում է, որ բողոքի ցույցին ձախ կազմակերպություններից մի քանի հազար մարդ է մասնակցել և քրդեր:
Անկարգությունները սկսվել են երթից հետո, երբ մի խումբ երիտասարդներ սկսել են ոստիկանների վրա քարեր ու մոլոտով կոկտեյլներ նետել: Ոստիկաններն արձագանքել են լուսաձայնային նռնակներով և արցունքաբեր գազով: Բողոքի ցույցի մասնակիցները նաև այրել են աղբարկղերը:
Հիշեցնենք, որ ամերիկյան մի շարք քաղաքներում տեղի ունեցող բողոքի ցույցերը սկսվել են մայիսի 25-ին սոցցանցերում մի տեսանյութի տարածումից հետո, որտեղ ոստիկանը Ջորջ Ֆլոյդ անունով աֆրոամերիկացի տղամարդուն պառկեցրել է գետնին ու ծնկով սեղմում է նրա վզին։ Անտեսելով տղամարդու շնչել չկարողանալու մասին խոսքերը՝ ոստիկանը հրաժարվել է նրան բաց թողնել, ինչի հետևանքով Ֆլոյդը մահացել է: