Մայիսի 27-ին ՊՊԾ գնդի գրավման գործով խմբի 10 անդամների գործով «Սասնա ծռերի» 6 անդամներ բերման կենթարկվեն դատարան։ Այս որոշումը կայացվեց գործով վերջին դատական նիստի ժամանակ՝ Երևանի ընդհանուր իրավասության դատարանի կողմից։
Բացակայող 6 ամբաստանյալների պաշտպանները միջնորդություն էին ուղարկել դատարանին՝ խնդրելով հետաձգել դատական նիստը, քանի որ իրենց պաշտպանյալները համաճարակային պայմաններում գտնվում են խոցելի խմբում։ Դատական նիստին ներկա էին միայն Պավել Մանուկյանը, Արմեն Բիլյանը և Սմբատ Բարսեղյանը։
Դատավոր Մեսրոպ Մակյանը առարկայազուրկ որակեց միջնորդությունները և նշեց, որ դատարանի դահլիճում առկա են բոլոր պայմանները անվտանգ դատական նիստը անցկացնելու համար։ Բացի դրանից, ըստ դատավորի՝ խախտվում է քննությունը ողջամիտ ժամկետում անցկացնելու պահանջը։ «Դատարանը արձանագրում է, որ բոլոր ամբաստանյալները եղել են պատշաճ ծանուցված։ Նրանց բացակայությունը անհարգելի է, և ղեկավարելով Քրեական դատավարության օրենսգրքի 153-րդ հոդվածով՝ դատարանը որոշում է կայացնում ամբաստանյալներ Վարուժան Ավետիսյանին, Մխիթար Ավետիսյանին, Էդուարդ Գրիգորյանին, Գագիկ Եղիազարյանին, Արայիկ Կյուրեղյանին և Սեդրակ Նազարյանին ոստիկանության միջոցով բերման ենթարկել հաջորդ դատական նիստին»,- նշել է դատավոր Մակյանը։
Մխիթար Ավետիսյանի պաշտպան Մուշեղ Շուշանյանը, «Առաջին լրատվական»-ի հետ զրույցում անդրադառնալով դատարանի որոշմանը և իրենց միջնորդությանը տված դատավորի գնահատականին, նկատեց, որ դատավորի կողմից նման պատճառաբանություն ու որակումը տրամաբանական որևէ բացատրության չի ենթարկվում, որովհետև նախորդ ամսին նույն հիմնավորմամբ միջնորդություն է ներկայացվել դատարան, և դատավորը համաձայնել է այդ միջնորդության հետ և որոշում է կայացրել դատական նիստը հետաձգել մինչև արտակարգ դրության ժամկետի ավարտը։ Դրանից հետո արտակարգ դրության ժամկետը երկարացվեց, բայց, Շուշանյանի խոսքերով, իրավիճակը չփոխվեց, վարակակիրների թիվը գնալով ավելանում է, և տրամաբանական չէ, որ նույնաբովանդակ միջնորդությունը արդեն երկրորդ անգամ մերժվում է։ «Մենք միջնորդությունը կազմելիս հղում էինք արել պարետ Տիգրան Ավինյանի որոշմանը, որ 8 քմ տարածության մեջ երկու անձից ավելի մարդ չպետք է գտնվի, այլ փաստարկներ ևս ներկայացրել էինք։ Մասնավորապես, որ Մխիթար Ավետիսյանը օնկոլոգիական խնդիրներ ունի, հետևաբար՝ խոցելի, ռիսկային խմբում է գտնվում, բայց դատարանը դա հաշվի չառավ։ Դատարանի այդ որոշումը բանականության, տրամաբանության մեջ չի տեղավորվում, բայց այլ հետևություններ անելու հիմքեր է տալիս»,- ասաց Շուշանյանը՝ հավելելով. «Այս որոշումը նշանակում է, որ դատարանը ցուցում է ստացել դատավարության պրոցեսն արագացնել։ Իսկ նիստերը ողջամիտ ժամկետներում անցկացնելու վերաբերյալ դատողությունն անհեթեթ է։ Ողջամիտ դատաքննության իրավունքը դա հանցագործության մեջ մեղադրվող անձի իրավունքն է։ Իրավունքից անիրազեկ մարդկանց վրա տպավորություն թողնելու փաստարկ էր դա։ Եթե դատավարության այլ մասնակիցների մեղքով դատավարությունն անհարկի ձգձգվեր, այդ դեպքում կարող էինք խոսել ողջամիտ ժամկետների մասին։ Բայց այդ մարդիկ իրենք են ասում, որ իրենց ու մյուսների առողջության մասին մտահոգ լինելով՝ չեն ցանկանում, որ այլոց առողջությունը վտանգեն»։
Նրա խոսքերով՝ իրենց պաշտպանյալներին բերման կենթարկեն, թե խափանման միջոց կփոխեն, դա «Սասնա ծռերի» համար կարևոր չէ։ Նրանք այդ փաստին կարևորություն չեն տալիս։ «Կգնան հաջորդ նիստին «ծռերը», թե ոչ, ես տեղյակ չեմ, բայց երևի առաջիկա օրերին կքննարկենք ու որոշում կկայացնենք»,- ասաց փաստաբանը։
Հիշեցնենք, որ «Սասնա ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու և պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու և դիտավորությամբ ոչնչացնելու մեջ։
Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։
ՊՊԾ գունդը զավթելու և նշված այլ արարքները կատարելու մեջ մեղադրվում է 32 անձ։