Թուրքիայից Մեծ Բրիտանիա ապրիլին ներմուծված 84 տ․ բժշկական պարագաներում եղած 400․000 հատ արտահագուստները անպիտան են ճանաչվել օգտագործման համար։ Բրիտանիայի առողջապահական չափանիշներին դրանք չեն համապատասխանել:
Դրանք պահվում են Լոնդոնի Հիթրոու օդանավակայանի պահեստում, քանի որ պիտանի չեն օգտագործման համար, տեղեկացնում է թուրքական «Diken» լրատվական կայքը, հղում անելով «The Guardian»-ին:
Նշվում է, որ այս լուրը հաստատել է նաև Բրիտանիայի առողջապահության նախարարությունը։ Հաղորդվում է, որ այդ պարագաները հետ են ուղարկվելու Թուրքիա՝ դրանց գումարը հետ փոխանցելու պահանջով։
Հիշեցնենք, որ Բրիտանիայի առողջապահության համակարգի կարիքների համար շտապ անհրաժեշտ բժշկական պարագաները պետք է այդ երկիր ուղարկվեին ապրիլի 19-ին, սակայն Թուրքիայում առաջացած թղթաբանական խնդիրների պատճառով անգլիական ինքնաթիռը 2 օր անց միայն կարողացավ ուղեբեռը տեղափոխել Լոնդոն։ Տեղափոխության ուշացումը կարճաժամկետ լարվածության պատճառ էր դարձել 2 երկրների միջև։