Թուրքիայի Հանրապետության հիմնադիր Մուստաֆա Քեմալ Աթաթուրքի հիմնադրած «Ժողովրդահանրապետական» կուսակցության (ԺՀԿ-CHP) պատգամավոր Սեզգին Թանրըքուլուն հորդորել է առերեսվել սեփական անցյալի և Հայոց ցեղասպանության հետ։
Հայոց ցեղասպանության 105-րդ տարելիցի կապակցությամբ Թանրըքուլուն սոցցանցերի իր էջերում գրել էր․ «1915թ․ ապրիլի 24-ին հարյուրավոր հայ մտավորականներ ձերբակալվեցին Ստամբուլում և տարվեցին Չանքըրը ու Անկարա և անհետ կորսվեցին։ Քանի դեռ անցյալի հետ չենք առերեսվել, վերքերը երբեք չեն բուժվի»։
Այս և ԺՀԿ-ի մի քանի այլ անդամների կողմից ցեղասպանության վերաբերյալ նախկինում արված նմանատիպ հայտարարությունները Թուրքիայում բացասական արձագանք են գտել։
Արձագանքողներից մեկը նույն կուսակցության նախկին փոխնախագահ, արտակարգ և լիազոր դեսպան Օնուր Օյմեն է, որն իր որոշ կուսակիցների կոչ է արել չհեռանալ հայկական հարցի վերաբերյալ դեռևս Աթաթուրքի կողմից ձևակերպած դրույթներից։
Օյմենը ԺՀԿ-ի իր կուսակիցներին կոչ է արել վերընթերցել կուսակցության ծրագիրը՝ մեջբերելով Հայաստանի հետ հարաբերություններ հաստատելու վերաբերյալ հատվածը։
«Հայաստանի հետ հարաբերությունների հաստատումը կախված է այդ երկրի կողմից օկուպացված արդբեջանական հողերից դուրս գալու, աշխարհի հայկական կազմակերպությունների միջոցով Թուրքիայի դեմ ցեղասպանության պնդումների վրա հիմնված նախաձեռնություններից հրաժարվելու, Հայաստանի որոշ փաստաթղթերի միջից Թուրքիային պատկանող որոշ հողերի նկատմամբ հավանկնություններ ունենալու տպավորություն ստեղծող ձևակերպումներն և խորհրդանիշները հեռացնելու պայմանների կատարումից»։
Օյմեն նաև Աթաթուրքի ճառերից մի հատված է մեջբերել, որտեղ հանրապետության հիմնադիրը կտրականապես ժխտում է հայկական կոտորածները՝ փոխարենը «մինչև ատամները զինված» հայերին մեղադրելով մուսուլմանների վրա հարձակումների ու անմեղ ժողովրդին կոտորելու մեջ։