Ապրիլյան քառօրյա պատերազմի հանգամանքներն ուսումնասիրող հանձնաժողովը ապրիլի 27-ին հյուրընկալել է Արցախի ոստիկանապետ, 2016 թվականի քառօրյա պատերազմի ժամանակ Արցախի պաշտպանության նախարար Լևոն Մնացականյանին: Մնացականյանը Սերժ Սարգսյանից հետո հանձնաժողովի փաստորեն առաջին հյուրն է:
Ինչու ենք, այսպես ասած, հաշվառում այդպիսի հաջորդականությամբ, որովհետև Սարգսյանն օրերս մասնակցելով հանձնաժողովի աշխատանքին՝ խոսել էր տարբեր պատասխանատուների մասին, որոնց պետք է ուղղել հարցերի մի մասը: Այդ մասին հայտարարեց հանձնաժողովի նախագահ Անդրանիկ Քոչարյանը: Նա նշել էր, որ Սերժ Սարգսյանը պատասխանել է բոլոր հարցերին՝ այդ պատասխաններում մատնացույց անելով նաև կոնկրետ պատասխանատուների, որոնք կարող են տալ որոշակի հարցերի առավել ամբողջական պատասխաններ: Ընդ որում, այդ շարքում խոսքը վերաբերել է նաև Արցախի ղեկավարության շրջանակին:
Փաստորեն, Լևոն Մնացականյանն այդ շրջանակի առաջին գործիչն է, որ մասնակցում է քառօրյա պատերազմի հանգամանքների ուսումնասիրման հանձնաժողովի աշխատանքին: Այդ իմաստով հետաքրքիր է՝ Լևոն Մնացականյանը կգա՞ր հանձնաժողովի նիստին, եթե դրանից առաջ չգար և հարցերին չպատասխաներ Սերժ Սարգսյանը: Այդ հանգամանքը հետաքրքիր է նրանով, որ հանձնաժողով ներկայանալուց հրաժարվել էր Յուրի Խաչատուրովը՝ ԶՈՒ գլխավոր շտաբի պետը:
Այդ տեսանկյունից հատկանշական է այն, որ չնայած հանձնաժողովի հարցերին պատասխանել է նաև Հայաստանի պաշտպանության նախկին նախարար Սեյրան Օհանյանը՝ այդուհանդերձ, Արցախի պաշտպանության նախարարն ըստ էության ավելի մոտ է ռազմական գործողությունների «էպիկենտրոնին», ընդ որում՝ այդ բառի ոչ միայն զուտ ռազմական իմաստով: Ըստ այդմ, ինչ-որ առումով Լևոն Մնացականյանի ֆունկցիոնալ շրջանակը համարժեք է Յուրի Խաչատուրովի շրջանակին՝ իհարկե դե ֆակտո, և իհարկե հայկական զինուժի արցախյան մասի առումով:
Այդ տեսանկյունից արդյոք Սերժ Սարգսյանը բացե՞ց ապրիլյան քառօրյա հանձնաժողովի մի ճանապարհ, որը «փակ» էր մինչ այդ: Խոսքը Արցախի ռազմաքաղաքական ղեկավարության ճանապարհի մասին է: Ընդ որում, այստեղ հատկանշական է այն, որ դա տեղի է ունենում նաև Արցախում նախագահի ընտրության ավարտի և նոր նախագահի իրողության ֆոնին, երբ պետք է ձևավորվի փաստացի Արցախի ռազմաքաղաքական նոր ղեկավարություն: Կունենա՞ դրանում որևէ դեր ապրիլյան հանձնաժողով տանող «ճանապարհը»: